Aýǵanstanda jer silkinisinen jaralanǵandar sany 320-dan asty
ASTANA. KAZINFORM – Aýǵanstanda 6,3 magnıtýdaly jer silkinisi saldarynan keminde 20 adam qaza tapty, dep habarlaıdy BBC.
Qutqarý jumystary jalǵasyp jatqandyqtan, qurbandar sany kóbeıýi yqtımal.
Eldiń Densaýlyq saqtaý mınıstrliginiń ókili Sharafat Zaman Amardyń málimetinshe, jaralanǵandardyń sany 320-dan asty.
Jerasty dúmpýi 3 qarashaǵa qaraǵan túni eldiń soltústigindegi halqy shamamen 500 myń adamdy quraıtyn Mazarı-Sharıf qalasynda bolǵan.
Bılik «qyzǵylt sary» deńgeıdegi qaýip týraly eskertý jarııalady, bul aıtarlyqtaı adam shyǵyny men qırandylardyń kóp bolý qaýpin bildiredi.
Talıbter úkimetiniń ókili Balh provıntsııasynda áleýmettik jelide jarııalaǵan vıdeoda Mazarı-Sharıftegi áıgili Golýbaıa meshit aýmaǵynda shashylǵan qırandylar kórinip tur. Bul meshitte alǵashqy shııt ımamynyń qabiri ornalasqan dep sanalady, al ol jerge jyl saıyn myńdaǵan qajy duǵa etýge jáne dinı merekelerdi atap ótýge keledi.
Aýǵanstan geologııalyq turǵyda seısmıkalyq belsendi aımaqta ornalasqan, munda Úndi jáne Eýrazııa tektonıkalyq plıtalary túıisedi.
Eske sala ketsek, bıyl 1 qyrkúıekke qaraǵan túni elde magnıtýdasy 6-ǵa teń joıqyn jer silkinisi bolyp, 2200-den astam adam qaza tapqan edi. Ol sońǵy jyldardaǵy eń joıqyn tabıǵı apattardyń biri boldy.
Aıta keteıik, búgin Aýǵanstandaǵy jer silkinisinen jeti adam qaza tapqany habarlandy.
یادي زلزلې د روضیې شریفي ښکلا ته هم ستر زیان رسولي.
— Haji zaid (@Hajisahib1234) November 2, 2025
👇 pic.twitter.com/U6Rj5n4PZF