Aýǵanstanda bolǵan jer silkinisi Shymkent turǵyndaryna sezilgen

ASTANA. QazAqparat – QR Tótenshe jaǵdaılar mınıstrligine qarasty «Seısmologııalyq tájirıbe-ádistemelik ekspedıtsııasy» JShS seısmıkalyq stansalar jelisi jer silkinisin tirkedi, dep habarlaıdy QazAqparat.

Zilzala 5 qańtar kúni Astana ýaqytymen saǵat 20:25 kezinde bolǵan.

Jerasty dúmpýiniń oshaǵy Almaty qalasynan ońtústik-batysqa qaraı 859 shaqyrym qashyqtyqta Aýǵanstan aýmaǵynda ornalasqan.

Energetıkalyq sanaty – 14,4. MPV magnıtýdasy – 6,6. Tereńdigi – 200 km. MSK-64 baǵany boıynsha Shymkent qalasynda 2-3 ball kóleminde sezilgen.

«Zardap shekkender men qıraǵan ǵımarattar týraly aqparat bolǵan joq» dep málim etti Shymkent qalalyq tótenshe jaǵdaılar departamentiniń qoǵammen baılanys toby.

Eske salaıyq, ótken jeltoqsan aıynda Almaty mańaıynda birneshe ret jer silkinisi tirkelgen bolatyn. Al 28 jeltoqsan kúni saǵat 23:17-de bolǵan dúmpýdi Almaty qalasynyń turǵyndary sezdi. Qýaty - 2-3 ball.

Foto: www.aa.com.tr