Aýǵanstanda beı-bereket atylǵan oqtan qaza tapqandar men jaraqat alǵandar sany 70-ten asty

KABÝL. QazAqparat – Pandjsher provıntsııasyn basyp alý týraly habarlamalardan keıin «Talıban» radıkaldy qozǵalysynyń sodyrlary jappaı beı-bereket oq jaýdyrǵan. Atys saldarynan elde qaza tapqandar men jaralanǵandar sany 70-ten asty. Bul týraly QazAqparat The Khaama Press agenttigine silteme jasap habarlaıdy.

Kabýldaǵy jedel járdem aýrýhanasy 4 qyrkúıekke qaraǵan túni 17 marqumnyń máıiti men jaraqat alǵan 40 adam jetkizilgenin rastady. Eldiń shyǵysynda Jelalabadtan kelgen derekterge sáıkes, ótken túnde atys saldarynan 17 adam qaza tapqan. Agenttik basqa qalalardan da aqparat kelip túsetindikten zardap shekkenderdiń sany artýy múmkin ekenin aıtady.

Buǵan deıin aýǵan aqparat quraldary habarlaǵandaı, Kabýlda eldegi bılikti basyp alǵan «Talıban» radıkaldy qozǵalysynyń sodyrlary beı-bereket oq jaýdyryp, baǵynbaǵan soltústik Pandjsher provıntsııasyn tolyq basyp alǵandyqtaryn osylaı atap ótken. Al aımaqtaǵy ulttyq qarsylyq ókilderi radıkaldardyń osy provıntsııaǵa baqylaý ornatqany týraly aqparatty joqqa shyǵardy.