Aýǵanstanda áıelin urǵandar jarty aıǵa, al ıtti qorlaǵandar 5 aıǵa qamalady

ASTANA. KAZINFORM — Aýǵanstanda áıelge qarsy zorlyq jasaǵany úshin sot 15 táýlikke qamaı alady, al ıtke nemese qoıǵa qatal qaraǵany úshin eń kóp degende 5 aıǵa deıin qamaıdy, dep habarlaıdy DW basylymy.

Aýǵanstannyń jańa zańyndaǵy 119-bap áıelderge qarsy zorlyqty zańdastyrady jáne boljamdy quqyqbuzýshylyqtar úshin jazany kim taǵaıyndaı alatynyn anyqtaıdy. Olardyń qatarynda ımamdar men kúıeýler de bar.

32-bapqa sáıkes, eger kúıeýi áıelin sonshalyqty qatty soqsa, onyń súıekteri synyp, ashyq jaraqattary nemese denesinde kógergen izder paıda bolsa jáne áıel sýdıaǵa júginse, kúıeýi qylmysker bolyp esepteledi. «Sot ony 15 táýlikke bas bostandyǵynan aıyrýǵa úkim shyǵarýy kerek», dep kórsetilgen bapta. Al eger er adam ıtke nemese qoıǵa qatal qarasa, oǵan eń kóp degende 5 aıǵa deıin qamaý qaýpi tónip tur.

Zań Aýǵanstanda osy jyldyń basynda qabyldanǵan, biraq halyqaralyq reaktsııany tek jaqynda týdyrdy. Aldymen aýǵandyq Rawadari quqyq qorǵaý uıymy ony pýshtý tilinde jarııalady, keıin Afghan Analysts Network qujatty aǵylshyn tiline aýdardy.

Women for Afghanistan uıymynyń basshysy Favzııa Kýfı ıspandyq El País gazetimen sóıleskende, áıel kúıeýiniń 15 kúnnen keıin bostandyqqa shyǵyp, ony óltirýi múmkin ekenin bilse, sotqa júginbeýi múmkin ekenin aıtty. Onyń baǵalaýynsha, jańa zań erlerge áıelderge zorlyq jasaý jáne azaptaý quqyǵyn beredi.

Tálipter bılikke qaıta oralǵan bes jyldan beri Aýǵanstandaǵy áıelderdiń quqyqtary aıtarlyqtaı shekteldi. UN Women málimetinshe, áıelderdiń 80%-y eńbek naryǵynan jáne bilim berý júıesinen tys qaldyrylǵan. BUU-nyń Adam quqyqtary jónindegi joǵarǵy komıssary Folker Tıýrk jańa dekret «áıelder men balalarǵa qarsy zorlyqty» zańdastyrady dep málimdedi jáne Aýǵanstan «adam quqyqtarynyń zıratyna» aınalǵanyn eskertti.

Aıta keteıik, buǵan deıin Aýǵanstanda áıelderge tálipterdiń bılikti basyp alý mereıtoıyn toılaýǵa tyıym salyndy.