Aýǵanstanda áıelderge arnalǵan radıostantsııanyń jumysy toqtatyldy

ASTANA.KAZINFORM - Aýǵanstan bıligi áıelder radıosy habar taratý saıasatyn buzdy dep málimdedi, dep jazady CNN.

Kabýlde ornalasqan Radio Begum – áıelder basqaratyn jáne áıelderdiń bilim alýyna baǵyttalǵan radıostantsııa. Radıostantsııanyń habarlaýynsha «Talıban» aqparat jáne mádenıet mınıstrliginiń ókilderi el astanasyndaǵy keńselerin tintý kezinde radıostantsııa qyzmetkerlerin ustap turǵanyn málimdedi.

Stantsııa habarlaǵandaı, seısenbide Begum qyzmetkerleriniń kompıýterleri, qatty dıskileri, faıldary men telefondary tárkilenip, uıymnyń basshylyq laýazymdarynda emes eki er adam tutqynǵa alynǵan.

Mınıstrlik keıinirek «habar taratý saıasatyn buzý men radıostantsııanyń lıtsenzııasyn teris paıdalanýy» dep túsindirdi, sonyń ishinde «sheteldik telearnaǵa baǵdarlamalardy ruqsatsyz berdi» degendi alǵa tartyp, radıostantsııa jumysynyń toqtatylatynyn habarlady.

Mınıstrlik qaı telearna týraly aıtyp jatqanyn naqtylamady.

«Shekarasyz reporterlar» táýelsiz quqyq qorǵaý uıymy ýaqytsha toqtatýdy aıyptap, ony qaıtarýdy talap etti.

Jumys toqtatylǵanǵa deıin Radio Begum stantsııasy Aýǵanstannyń barlyq óńirindegi áıelder úshin kún saıyn alty saǵattyq sabaqtar, sondaı-aq densaýlyq, psıhologııa jáne rýhanııat baǵdarlamalaryn efırge shyǵaratyn.

Buǵan deıin Talıbannyń izgilik mınıstri Halıd Hanafıdiń áıelderge tek er adamdarmen ǵana emes, bir-birimen de qoǵamdyq oryndarda sóılesýge tyıym salǵany habarlanǵan bolatyn.