Aýǵanstanda 6 magnıtýdaly jer silkinisi bolyp, 250-den asa adam qaza tapty

ASTANA. KAZINFORM — Aýǵanstannyń shyǵysyndaǵy Kýnar provıntsııasynda magnıtýdasy 6-ǵa jetetin jer silkinisi bolyp, aldyn ala málimetter boıynsha 250-den astam adam kóz jumdy, dep habarlaıdy Anadoly. 

Bul týraly Aýǵanstan Aqparat mınıstrliginiń ókili habarlady.

Onyń sózinshe, eń kóp zardap Kýnar provıntsııasynyń aýdandarynda tirkelgen, joldar topan sý men jer qabaty syrǵýy saldarynan jabylǵan, izdeý-qutqarý jumystary tikushaqtardyń kómegimen júrgizilip jatyr. Zardap shekkenderdiń sany 500-den astam, al qaza tapqandar sanynyń kóbeıýi múmkin.

Aýǵanstan ýaqytsha úkimetiniń baspasóz hatshysy Zabıhýlla Mýdjahıd AQSh kompanııasy X áleýmettik jelisinde jer silkinisi adam shyǵynyna alyp kelgenin rastady.

— Ókinishke qaraı, búgingi jer silkinisi shyǵys provıntsııalarynda adam ólimine jáne materıaldyq zalalǵa ákeldi, — dedi ol.

Ol jergilikti bılik pen turǵyndardyń qutqarý operatsııalaryna qatysyp jatqanyn, ortalyq úkimet pen kórshiles provıntsııalardan komandalar apat aımaǵyna jiberilip jatqanyn atap ótti.

Jergilikti sheneýnikter bul elde bolǵan eń kúshti jer silkinisterdiń biri ekenin atap ótti. Sonymen qatar, óńirde magnıtýdasy 5,2-ge jetetin kem degende eki qaıtalama dúmpý tirkelgen.

AQSh Geologııalyq qyzmetiniń (USGS) dereginshe, jer silkinisiniń epıtsentri Djelalabadtan soltústik-shyǵysqa qaraı 27 shaqyrym jerde, 8 shaqyrym tereńdikte ornalasqan, Pákistanmen shekaraǵa jaqyn.

Buǵan deıin 27 tamyzda Aýǵanstan aýmaǵynda magnıtýdasy 5,7 bolatyn jer silkinisi tirkelgenin jazǵanbyz.