Aýǵanstanda 52 áıel men bir qyz kıim talaptaryn buzdy degen kúdikpen ustalǵan
ASTANA. KAZINFORM – 2026 jylǵy shilde-qyrkúıek aralyǵynda Aýǵanstanda keminde 52 áıel men bir qyz kıim úlgisi men syrtqy kelbetke qoıylatyn talaptardy buzdy degen kúdikpen qamaýǵa alynǵan nemese ustalǵan. Bul týraly Kazinform agenttigi BUU-nyń Aýǵanstanǵa kómek kórsetý mıssııasyna (UNAMA) silteme jasap habarlaıdy.
UNAMA eldiń birneshe aýdanynda is júzindegi bılik ókilderiniń áıelder men qyzdardy jaqynda qamaýǵa alýy, ustaýy jáne qamaýǵa alatynyn aıtyp qorqytýyna baılanysty alańdaýshylyq bildirdi.
Mıssııanyń rastalǵan derekterine sáıkes, 2026 jylǵy shilde-qyrkúıek aralyǵynda Gerat pen Kabýl qalalarynda keminde 52 áıel men bir qyz qamaýǵa alynǵan nemese ustalǵan. Basqa áıelderge de qamaýǵa alynatyny eskertilgen.
BUU málimetinshe, mundaı jaǵdaılardyń naqty sany budan áldeqaıda kóp bolýy múmkin. Óıtkeni qaýipsizdikke qatysty alańdaýshylyq pen áleýmettik stıgma saldarynan oqıǵalar týraly aqparat tolyq túspeıdi.
Oqıǵalar Aýǵanstandaǵy is júzindegi bılik belgilegen kıim talaptaryn buzdy degen kúdikpen baılanysty. Atap aıtqanda, áıelder chadra kımegeni, shashy kóringeni, ashyq tústi oramal taqqany nemese makııaj jasaǵany, sondaı-aq qoǵamdyq oryndarǵa mahramsyz, ıaǵnı jaqyn týystarynyń arasynan shyqqan er adamnyń erip júrýinsiz barǵany úshin ustalǵan.
UNAMA habarlaýynsha, áıelder birneshe saǵat qamaýda bolǵannan keıin bosatylǵan.
Buǵan qosa, mıssııa áıelderge, sonyń ishinde dúken ıelerine qatysty aýyzsha qorlaý, uryp-soǵý jáne qorqytý oqıǵalaryna alańdaýshylyq bildirdi.
BUU mundaı áreketter áıelder men qyzdardyń júrip-turý, óz pikirin bildirý jáne jeke derbestik quqyqtaryn buzatynyn atap ótti. Qamaýǵa alý men ustaý olardyń áleýmettik stıgmaǵa ushyraýyna jáne qoǵamnan odan ári shettetilýine de ákeledi.
UNAMA Aýǵanstannyń is júzindegi bıligin áıelder men qyzdarǵa qatysty belgilengen erejelerdi kemsitýshilikpen qoldanýdy toqtatýǵa, barlyq aýǵan azamatynyń quqyqtary men qadir-qasıetin qurmetteýge, sondaı-aq eldiń adam quqyqtary salasyndaǵy halyqaralyq mindettemelerin oryndaýǵa shaqyrdy.
Buǵan deıin BUU Qaýipsizdik Keńesi Aýǵanstanǵa qatysty qarardy biraýyzdan qabyldap, bıliktegi «Talıban» qozǵalysyn áıelder men qyzdarǵa qoıylǵan shekteýlerdi alyp tastaýǵa shaqyrǵan bolatyn.
Sondaı-aq Aýǵanstanda otbasylyq quqyq týraly jańa zań qabyldanǵany habarlandy. Ol belgili bir jaǵdaılarda kámeletke tolmaǵandardyń qatysýymen qıylǵan nekelerdi zańdy dep tanıdy. Máselen, zańnyń 7-babynda balıǵat jasyna jetken boıjetkenniń únsiz qalýy nekege kelisim bergeni retinde túsindirilýi múmkin ekeni jazylǵan. Bul ereje er adamdarǵa jáne buryn nekede bolǵan áıelderge qoldanylmaıdy.
Osyǵan deıin Aýǵanstanda demonstratsııalarǵa tolyq tyıym salynǵany týraly jazdyq.
