Aýǵanstanda 500-ge jýyq sodyr kúzet beketine shabýyl jasady
ASTANA. QazAqparat - Aýǵanstannyń ortalyq bóligindegi Gor provıntsııasynda kúzet beketine 500-ge jýyq sodyr shabýyl jasady. Qaqtyǵys barysynda 15 sodyrdyń kózi joıylyp, 20-sy jaraqat aldy, dep habarlady jergilikti bılikke silteme jasap Pajvak agenttigi.
Oqıǵa beısenbi keshke Pasaband aýdanynda oryn aldy. Agenttikke jergilikti polıtsııa basshysy Abdýlla Han habarlaǵandaı, sodyrlarmen atys áli jalǵasýda.
Polıtsııa ókili qaqtyǵys saldarynan quqyq qorǵaý organdarynyń eki qyzmetkeri qaıtys bolǵanyn, taǵy úsheýi jaralanǵanyn málimdedi. Ol aýdanǵa kiretin basty joldy «Talıban» radıkaldyq qozǵalys sodyrlary jaýyp tastaǵanyn, jabdyqtaý aýadan júzege asyrylyp jatqanyn qosty. Qaqtyǵys týraly málimetti provıntsııa gýbernatorynyń ókili Abdýl Haı Hatıbı rastady, dep habarlady RIA Novostı .
Sońǵy aılarda Aýǵanstandaǵy jaǵdaı nasharlap ketti. Eldiń eleýli bóligin ıelengen «Talıban» radıkaldyq toby iri qalalardy shabýyldaı bastady. El aýmaǵynda birqatar jerlerde tyıym salynǵan «Islam memleketiniń» yqpaly artýda.
