Aýǵanstanda 22 mln adam ashtyqtyq zardabyn tartýda
Qaqtyǵystar, ekonomıkalyq kúızelister, tabıǵı apattar, saıası turaqsyzdyq, sondaı-aq gýmanıtarlyq kómek jetkizýdegi qıyndyqtar planetanyń ártúrli núktelerindegi azyq-túlik daǵdarysyn kúsheıtýde. BUU mekemeleri olardyń 20-yn anyqtady.
Dúnıejúzilik azyq-túlik baǵdarlamasy (DAB) men Azyq-túlik jáne aýyl sharýashylyǵy uıymy (AAU) daıyndaǵan baıandama avtorlary Efıopııa, Nıgerııa, Ońtústik Sýdan jáne Iemen elderindegi jaǵdaıǵa alańdaýshylyq tanytqan. Osy tórt eldiń turǵyndary besinshi deńgeıdegi azyq-túlik daǵdarysyn bastan ótkerýde. Bul degenimiz olardyń basym bóligi ashtyqtan kóz jumýy múmkin.
Zertteý asharshylyq pen qaqtyǵystyń baılanysyn taǵy bir ret dáleldedi. Asharshylyq aldynda turǵan adamdar - áskerı qaqtyǵystar saldarynan óz úılerin tastap ketýge májbúr bolǵandar. Olar baspanasyz, jalaqysyz qalǵandar.
Azyq-túlikke baılanysty jaǵdaı nasharlap jatqan elder qatarynda Mıanma, Ortalyq Afrıka Respýblıkasy, Kongo Demokratııalyq Respýblıkasy, Somalı jáne basqalar.
Sonymen qatar, Gaıtı, Shyǵys Afrıka, Madagaskar, Mozambık, Aýǵanstannyń batys aýdandarynyń turǵyndaryna klımattyń ózgerýine baılanysty azyq-túlik jetpeı jatyr.
Pandemııa men onyń ekonomıkalyq zardaby jaǵdaıdy qıyndatýda: 2020 jyldyń mamyrynan bastap azyq-túlik baǵasy qymbattap jatyr, ásirese Taıaý Shyǵys, Soltústik Afrıka, Ortalyq jáne Shyǵys Azııada qatty sezilýde.
Baıandama avtorlarynyń málimetinshe, Aýǵanstanda tamaqty toıyp ishpeıtinder sany rekordtyq kórsetkishke jetip, 22,8 mln adamdy quraǵan. Sarapshylar shara qoldanbasa osy el turǵyndary asharshylyqtan qyrylýy múmkin dep boljap otyr.
