Aýǵanstan sý resýrstaryn basqarý platformalaryna shaqyryp jatqan OA elderiniń erik-jigerin erekshe baǵalady
TAShKENT. KAZINFORM – Resmı Kabýl sý resýrstaryn basqarý platformalaryna shaqyryp jatqan aımaq elderiniń erik-jigerin erekshe baǵalaıdy. Muny Ortalyq Azııa halyqaralyq ınstıtýtynda ótken dóńgelek ústelge qatysqan Aýǵanstan Syrtqy ister mınıstrligine qarasty Strategııalyq zertteýler ınstıtýtynyń dırektory Abdýlhaı Kanıt aıtty, dep habarlaıdy Kazinform agenttiginiń Tashkenttegi menshikti tilshisi.
- Sý tapshylyǵy máselesin sheshý úshin aımaq elderi birigýi kerek. Bir-birimizben yntymaqtasý úshin áýeli dıalog alańy qajet. Ókinishke qaraı, Aýǵanstan Ortalyq Azııadaǵy sý resýrstaryn paıdalaný men basqarý jónindegi kelisimder men protsesterdiń eshqaısysyna qatyspady. Ortalyq Azııa elderi bul jumystarǵa resmı Kabýldy endi tartyp jatyr. Tıisinshe, biz memleketterdiń mundaı erik-jigerin erekshe baǵalaımyz jáne ol keleshek yntymaqtastyqqa oń yqpal etedi dep sanaımyz. Biz ıdeıalardy toptastyrý úshin dıalog júrgizip, keıin úkimetterge tıisti usynystar ázirleýimiz qajet, - dedi Abdýlhaı Kanıt BAQ ókilderiniń saýalyna jaýap bere otyryp.
Eske salaıyq, osy is-sharada sóz sóılegen Ortalyq Azııa halyqaralyq ınstıtýtynyń dırektory Javlon Vahabov óńirdegi sý tapshylyǵy aldaǵy jyldary ekonomıkanyń damýyn tejeıtin negizgi faktorǵa aınalatynyn atap ótti.
Buǵan deıin habarlaǵanymyzdaı, bıyl sáýirde elordada ótetin Óńirlik ekologııalyq sammıtinde Ortalyq Azııa elderiniń basshylary Astana deklaratsııasyna qol qoıady.
Qosa ketsek, aldaǵy ýaqytta Ózbekstan jasandy jolmen jańbyr jaýdyrý tehnologııasyn engizýdi kózdep otyr.
Munymen birge Ózbekstan 2028 jylǵa deıin alqaptardyń 80%-yna sý únemdeý tehnologııalaryn engizbek.
Taıaýda Kazinform agenttigine Sý resýrstary jáne ırrıgatsııa mınıstri Nurjan Nurjigitov málim etkendeı, qazirgi ýaqytta Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatyr.
