Aýǵanstan soǵys ardagerleri «Qazaqstan - 2020» demokratııalyq kúshterdiń jalpyulttyq koalıtsııasyna qoldaý bildiredi
ANA. 18 qańtar. QazAqparat /Qanat Mámetqazyuly/ - Aýǵanstan soǵys ardagerleri QR Prezıdenti Nursultan Nazarbaevtyń prezıdenttik ókilettigin 2020 jylǵa deıin uzartý jónindegi referendýmdy ótkizýdi qoldap otyr.
Búgin Astanada Aýǵanstan soǵysy ardagerleri uıymdarynyń «Qazaqstan ardagerleri» qaýymdastyǵy men Astana qalasynyń «Aýǵanstan soǵysy múgedekteri men ardagerleri odaǵy» qoǵamdyq birlestigi «Nur Otan» HDP «Qazaqstan-2020» demokratııalyq kúshterdiń jalpyulttyq koalıtsııasyn qoldaý jónindegi aktıv májilisin ótkizdi.
«Prezıdent N. Nazarbaevtyń júrgizip otyrǵan salıqaly saıasatyn Qazaqstan halqy qýattap kele jatqany belgili. Elbasynyń elimizdegi saıası jáne ekonomıkalyq turaqtylyqty saqtaýǵa jáne damytýǵa baǵyttalyp júrgizip jatqan saıasaty óz jemisin berýde. Búgingi tańda Ult kóshbasshysy bolyp otyrǵan N. Nazarbaev elimizdegi azamattyq ınstıtýttardyń, atap aıtqanda qoǵamdyq birlestikterdiń qyzmet etýine, jumystar atqarýyna qoldaý bildirip otyr. Osy oraıda, Aýǵanstan soǵysynyń ardagerleri de Memleket basshysynyń saıasatyn qoldaýshylary bolyp tabylady jáne «Nur Otan» HDP Tuńǵysh Prezıdentti qoldaý jónindegi koalıtsııa qurý bastamasyn úlken yqylaspen qoldaıdy», - delingen aktıv jıylysynyń taratqan málimdemesinde.
«Jalpy, Prezıdent N. Nazarbaev búgingi kúni úlken halyqaralyq bedelge ıe. Astanada EQYU-nyń Sammıti ótti, jaqynda qysqy Azıada oıyndary bastalady. Bundaı ıgilikti sharanyń barlyǵy bizdiń elimizdiń halyqaralyq arenadaǵy bedeliniń óskendiginiń aıǵaǵy. Al bundaǵy basty eńbek Elbasy N. Nazarbaevqa tıesili», - deıdi «Aýǵanstan soǵysy múgedekteri men ardagerleri odaǵy» qoǵamdyq birlestiginiń múshesi Ǵalym Qojabekov. Onyń aıtýynsha, Prezıdenttiń ókilettigin 2020 jylǵa deıin uzartý týraly bastama halyqtyń tileginen týyndap otyr jáne Aýǵanstan soǵys ardagerleri bul bastamany tolyq qoldaıdy. Sondyqtan da, ınternatsıonalıst-jaýyngerler demokratııalyq kúshterdiń jalpyulttyq koalıtsııasyna qosylýǵa nıetti.
