Aýǵanstan prezıdenti H.Karzaı tálibterdiń qaza bolǵan kóshbasshysyn «beıbitshilik qurbany» dep atady
ASTANA. QazAqparat - Aýǵanstan Islam memleketiniń prezıdenti Hamıd Karzaı seısenbi kúni «Talıban» qozǵalysy komandırleriniń biri molla Abdýla Rakıbtiń óltirilýin aıyptady, dep habarlady «Tolonıýs» aýǵan agenttiginen.
Aýǵan basshysy tálib ókiliniń ólimin «beıbitshilik qurbany» dep atady. Molla Abdýla Rakıb «Talıban» qozǵalysy men resmı Kabýl arasyndaǵy kelissózder jaqtasy sanaldy. «Tehrık-Islamı Talıban» kóshbasshylarynyń biri qaza bolsa da, Hamıd Karzaı tálibterdi Aýǵanstanǵa oralyp, beıbit kelissózder júrgizýge shaqyrýda.
Molla Abdýla Rakıbti belgisiz bireýler Pákistannyń Peshavar qalasynda dúısenbi kúni atyp ketken. Kelesi kúni onyń máıiti - týǵan qalasy Aýǵanstannyń soltústik-shyǵysyndaǵy Tahar provıntsııasyna jetkizildi.
Aýǵan basylymdary, tálibter komandırleriniń Pákistanda oqqa ushyp otyrǵan birinshi jaǵdaı emestigin jazdy. Sońǵy jyldary AQSh-tyń áskerı kúshteri Pákistanda «Talıban» áreketterine ushqyshsyz ushý apparattary arqyly shabýyl jasaýda.
Óz kezeginde, aýǵan prezıdenti H.Karzaı tálibterge jasalǵan shabýyldardyń qıyndyq týdyryp otyrǵanyn jáne «AQSh-tyń osyndaı qarsylyǵy tálibterdi beıbit kelissózderge kelýine kedergi keltirip otyrǵanyn» aıtqan.
«Beıbit kelissózder júrgizgisi kelgender boldy, biraq olardyń kóbi óltirildi», - dedi H.Karzaıdyń baspasóz hatshysynyń orynbasary Faıek Vahıdı.
