Aýǵanstan Pákistannan kelgen 28 sodyrdyń kózin joıǵanyn málimdedi
ASTANA. KAZINFORM — Aýǵanstan Qorǵanys mınıstrligi Nýrıstan provıntsııasynyń shyǵysynda 28 qarýly jaýyngerdiń kózi joıylǵanyn málimdedi. Kabýldyń dereginshe, olar Pákistan aýmaǵynan shekara arqyly ótken, dep habarlaıdy Al Jazeera.
Aýǵanstannyń Qorǵanys mınıstrligi qaqtyǵys 27 qyrkúıek, jeksenbi kúni bolǵanyn habarlady.
Mınıstrliktiń málimetinshe, qaza tapqandardyń basym bóligi Aýǵanstannyń burynǵy úkimeti tusynda kúshtik qurylymdarda qyzmet etken. Aýǵanstan bıligi olardy Pákistan arnaıy qyzmetteri jaldaǵan dep otyr. Qaza tapqandardyń arasynda «Islam memleketi» (IGIL) terrorıstik uıymynyń sodyrlary da bolǵanyn málimdedi.
Pákistan bıligi bul aıyptaýlardy joqqa shyǵaryp, olardy negizsiz ári shyndyqqa janaspaıdy dep atady.
Pákistannyń Aqparat jáne habar taratý mınıstrligi eldiń kúshtik qurylymdary men barlaý organdary Nýrıstandaǵy qaqtyǵysqa qatyspaǵanyn málimdedi. Sondaı-aq olar Aýǵanstannyń burynǵy kúshtik qurylymdarynyń ókilderin jaldaýmen, daıarlaýmen nemese qarýly toptarǵa qoldaý kórsetýmen aınalyspaǵanyn aıtty.
Óz kezeginde Islamabad Aýǵanstan bıligin Pákistan tarapynyń málimdeýinshe, Aýǵanstan aýmaǵynan áreket etip jatqan terrorıstik uıymdarǵa qarsy shara qabyldaýǵa shaqyrdy.
Eske salaıyq, buǵan deıin Aýǵanstannyń shyǵys provıntsııalarynda Pákistannyń áýe shabýylynan úsh beıbit turǵyn qaza taýyp, taǵy tórteýi jaralanǵan bolatyn.
