Aýǵanstan Ózbekstanmen Haıraton-Mazarı Sharıf temir joly boıynsha kelisim-shartty uzartty
ASTANA. KAZINFORM - Aýǵanstannyń qoǵamdyq jumystar mınıstrligi «Haıraton-Mazarı Sharıf» temir jol jelisin paıdalaný jáne kútip ustaý boıynsha Ózbekstannyń «Sogdiana Trans» kompanııasymen kelisimshartty eki jylǵa uzartty. Bul týraly Pajhwok habarlady.
Qujatqa sáıkes, «Ózbekstan temir joldary» («Ўzbekıston temır ıўlları» ) AQ enshiles kásiporny «Sogdiana Trans» 2025-2026 jyldar boıy temir jol jelisiniń jaǵdaıyn baqylaıdy.
«Ózbekstan temir joldary» kompanııasy Aýǵanstanmen Haıraton ýchaskesindegi jóndeý jumystaryn uzartý týraly kelisimge de qol qoıdy.
Sonymen qatar taraptar Ortalyq Azııa elderin Pákistan teńiz porttarymen baılanystyrýy tıis Transaýǵan temir joly jobasyn talqylady. Ózbekstan jobanyń tehnıkalyq-ekonomıkalyq negizdemesin ázirleýdi, sonyń ishinde tıisti sharalardy qarjylandyrýdy óz moınyna alǵany atap ótildi.
«Haıraton – Mazarı Sharıf» temir jolynyń jalpy uzyndyǵy 75 shaqyrymdy quraıdy. Ony 2010 jyly Ózbekstan mamandary salǵan. Qurylysqa Azııa damý banki bólgen 129 mıllıon dollar jumsalǵan. Bul jeli Ózbekstanda qoldanylatyn tehnıkalyq standarttar men talaptarǵa sáıkes sıgnalızatsııa, telekommýnıkatsııa jáne elektr qurylǵylarymen jabdyqtalǵan.
Bul jeli Aýǵanstannyń soltústik provıntsııalarynyń neǵurlym damyǵan jáne halyq tyǵyz ornalasqan aýdandarynda temir jol kóligin uıymdastyrýǵa, sondaı-aq Aýǵanstan men aımaqtyń basqa elderi arasyndaǵy tasymaldaý shyǵyndaryn azaıtýǵa múmkindik beredi.
Eske sala keteıik, Ózbekstan Aýǵanstanǵa 200 tonnaǵa jýyq gýmanıtarlyq kómek jibergeni jaıly jazǵan edik.