Aýǵanstan órt sóndirýshileri Kókshetaýda bilim alady
ASTANA. QazAqparat - QR Parlamenti Senaty «QR Úkimeti men Aýǵanstan Islam Respýblıkasy arasyndaǵy azamattyq qorǵanys, tótenshe jaǵdaılardy aldyn alý jáne olardyń saldaryn joıý salasyndaǵy yntymaqtastyq týraly» kelisimdi ratıfıkatsııalaý týraly zań jobasyn qabyldady.
«Kelisimge Aýǵanstan Islam Respýblıkasy prezıdentiniń Qazaqstan Respýblıkasyna resmı sapary barysynda Astana qalasynda 2015 jyldyń 20 qarashasynda qol qoıyldy. Atalǵan kelisimniń kúshine enýi tótenshe jaǵdaılardy monıtorıngileý jáne boljaý jasaý salasynda tájirıbelermen almasý, qaýip týyndaǵan jaǵdaıda turǵyndardy daıyndaýǵa, eki memlekettiń oqý oryndarynda azamattyq qorǵaý salasyndaǵy mamandardy oqytý, turaqty negizde birlesken konferentsııalardy, semınarlardy, daıyndyqtardy ótkizý, taraptyń aýmaǵynda týyndaǵan tótenshe jaǵdaılardy joıý kezinde qysqa merzimde kómek kórsetý múmkindik beredi», - dedi QR Іshki ister mınıstri Qalmuhambet Qasymov Senatta zań jobasyn tanystyrý kezinde.
Mınıstrdiń sózi boıynsha, zań jobasy elimiz úshin teris saldarlarǵa ákep soqtyrmaıdy. Sonymen qatar ony qabyldaý taraptardyń aýmaǵyndaǵy tabıǵı jáne tehnogendik sıpattaǵy tótenshe jaǵdaılardyń saldaryn azaıtýǵa yqpal etedi.
Depýtattardyń saýalyna jaýap berý barysynda mınıstr, kelisim boıynsha, Aýǵanstan mamandaryn Kókshetaý tehnıkalyq ınstıtýtynda órt qaýipsizdigi fakýltetinde oqytý josparlanyp otyrǵandyǵyn atap ótti. Olardyń oqý aqysy Aýǵanstanǵa halyqaralyq uıymdar berip otyrǵan maqsatty granttar esebinen óteledi.
