Aýǵanstan men Pákistan Stambýlda qaıtadan kelissóz júrgizbek
ASTANA. KAZINFORM — Aýǵanstan men Pákistan shekaradaǵy jaǵdaıdy retteý jónindegi kelissózderdi jalǵastyrýǵa kelisti. Kelissózderdiń jańa kezeńi 6 qarashada Stambýl qalasynda ótpek. Bul týraly TASS habarlady.
Aldaǵy kezdesýler týraly málimet Túrkııa men Qatardyń araǵaıyndyǵymen ótken kelissózderdiń qorytyndysy boıynsha taraptar qabyldaǵan birlesken málimdemede kórsetilgen. Qujatty Túrkııa Syrtqy ister mınıstrligi taratty.
— Aýǵanstan, Pákistan, Túrkııa jáne Qatar 25–30 qazan aralyǵynda Stambýlda kezdesýler ótkizdi. Kezdesýdiń maqsaty — osy jylǵy 18–19 qazanda Dohada Túrkııa men Qatardyń deldaldyǵymen Aýǵanstan men Pákistan arasynda qol jetkizilgen atysty toqtatý rejımin nyǵaıtý boldy. Barlyq taraptar bitim shartyn jalǵastyrýǵa kelisti. Onyń ári qaraı júzege asyrylý sharttary 6 qarashada Stambýlda ótetin kezdesýde talqylanyp, naqty sheshim qabyldanady, — delingen málimdemede.
Qujatta sondaı-aq barlyq taraptardyń beıbitshilikti saqtaý men sharttardy buzǵandarǵa sanktsııa qoldanýdy qamtamasyz etetin monıtorıng jáne tekserý tetigin qurýǵa ýaǵdalasqany atap ótilgen.
— Araǵaıyn elder retinde Túrkııa men Qatar taraptardyń belsendi qatysýyna rızashylyq bildirip, aımaqta turaqty beıbitshilik pen qaýipsizdikti qamtamasyz etý maqsatynda yntymaqtastyqty jalǵastyrýǵa daıyn ekenin málimdedi, — dep kórsetilgen málimdemede.
Eske sala ketsek, Túrkııa prezıdenti Rejep Taıyp Erdoǵannyń nusqaýymen Dohada kelissózder ótip, onda Pákistan men Aýǵanstan arasynda syndarly dıalog ornatýǵa múmkindik týǵanyn habarlaǵanbyz.
19 qazan kúni Aýǵanstan men Pákistan atysty tez arada toqtatý týraly kelisimge kelgenin de jazdyq.