Aýǵanstan men Pákistan shekarasyndaǵy ahýal áli de ýshyǵyp tur
ASTANA. KAZINFORM – Pákistandyq BAQ-tyń habarlaýynsha, Aýǵanstan kúshteri shekaradaǵy Kýrram aýdanynda ornalasqan pákistandyq áskerge «negizsiz» shabýyl jasaǵan. Bul týraly Anadolý aqparat agenttigi jazdy.
Aýǵanstan men Pákistan arasynda eki eldiń shekarasy sanalatyn Dıýrand syzyǵy mańynda qaqtyǵystar qaıta jalǵasyp jatyr.
Kabýldan habar taratatyn Tolo News kabeldik telearnasy amerıkalyq X áleýmettik jelisinde jarııalaǵan málimetke sáıkes, ótken aptada Aýǵanstan men Pákistan shekara qyzmetteri arasynda taǵy da birneshe qaqtyǵys bolǵan.
Tolo News telearnasyna bergen suhbatynda Aýǵanstannyń shyǵysyndaǵy Host provıntsııasynyń gýbernatorynyń baspasóz hatshysy aýǵan kúshteri Dıýrand syzyǵy mańynda pákistandyq áskerge shabýyl jasaǵanyn rastady.
Onyń aıtýynsha, Pákistan shabýylǵa daıyndalǵan, biraq «maqsatyna jete almaǵan», al qaqtyǵystar áli de jalǵasyp jatyr.
Karachıde ornalasqan Geo News telearnasy pákistandyq qaýipsizdik qurylymdaryndaǵy derekkózderge silteme jasap, Aýǵanstan kúshteri Pákistan áskerine «esh sebepsiz» shabýyl jasaǵanyn habarlady. Shabýyl Kýrram aýdanyndaǵy shekarada bolǵan.
Atalǵan derekkózder Pákistan áskeriniń bul shabýylǵa «qatań ári dereý jaýap bergenin» aıta otyryp, qaqtyǵys barysynda birneshe aýǵan bazasyna aıtarlyqtaı zalal kelgenin jáne bir tankiniń joıylǵanyn málimdedi.
Sondaı-aq derekkózder Pákistan áskeri «joǵary jaýyngerlik daıyndyq jaǵdaıynda» ekenin jáne eldi bolýy múmkin shabýyldardan qorǵaýǵa tolyq daıyn turǵanyn jetkizdi.
Aıta keteıik, buǵan deıin Aýǵanstan shekarasyndaǵy Pákistan áskeri joǵary áskerı daıyndyq rejımine aýystyrylǵanyn habarlaǵanbyz.