Aýǵanstan men Pákistan shekarasynda qaqtyǵys bolyp jatyr

ASTANA. KAZINFORM — Aýǵanstan men Pákistan shekarasyndaǵy Paktııa provıntsııasynda eki eldiń shekaralyq kúshteri arasynda qaqtyǵys bolyp jatyr, dep habarlaıdy Anadoly.

Kabýldyń Tolo News kabeldik telekompanııasy jarııalaǵan aqparatqa sáıkes, Pákistanmen shekaraǵa jaqyn ornalasqan Paktııa provıntsııasynyń birneshe aýdanynda eki eldiń shekara kúshteri arasynda qaqtyǵystar boldy.

Qaýipsizdik kúshteri málimetinshe, Aýǵanstan eki eldiń shekarasy sanalatyn Dıýrand syzyǵy mańyndaǵy Pákistan bazalaryn nysanaǵa alǵan. Bul shabýyldar Pákistannyń áýe operatsııalaryna jaýap retinde jasalǵan.

— Bul bazalardyń keıbiri basyp alyndy, qaqtyǵysta 12 pákistandyq áskerı qaza tapty, — delingen aqparatta.

Aımaq turǵyndary Dand-e-Patan aýdanyndaǵy qaqtyǵystyń saldarynan beıbit turǵyndar úılerin tastap ketýge májbúr bolǵanyn habarlady.

Islamabadta shyǵatyn Dawn gazetiniń habarlaýynsha, Pákistan armııasy shabýyldarǵa tez jáne batyl jaýap berip, Aýǵanstan sodyrlarynyń kóptegen bazalary men pozıtsııalaryna qatty zaqym keltirgen.

Bılik Pákistan armııasynyń artıllerııamen, tanktermen, jeńil jáne aýyr qarýlarmen jaýap bergenin, sonymen qatar ushqyshsyz ushatyn apparattardy qoldanǵanyn atap ótti.

Aýǵanstan men Pákistan arasyndaǵy shıelenis

9 qazanda Aýǵanstan astanasy Kabýlda jarylystardyń daýysy estildi.

Pákistandyq áskerı ushaqtar Aýǵanstannyń Paktııa provıntsııasynyń Marga aýdanynda áýe shabýylyn jasady degen boljam bar. Artynsha Aýǵanstan úkimeti Marga men el astanasy Kabýldaǵy jarylystar úshin Pákistandy aıyptady. Alaıda Pákistan áýe shabýylyna qatysty málimdeme jasaǵan joq.