Aýǵanstan men Pákistanda qar kóshkininen 100-den astam adam qaza tapty
ASTANA. QazAqparat - Aýǵanstan men Pákistanda qar kóshkininen 100-den astam adam qaza tapty. Bul týraly BBC News habarlady.
Sońǵy derekterge súıensek, Aýǵanstanda tabıǵı apat saldarynan 106 adam qaza taýyp, onshaqty adam zardap shekti. Eń kóp kóz jumǵandar - Pákistan shekarasyndaǵy Nýrıstan provıntsııasynda. Bul aýmaqta eki aýyl, sonyń birinde 53 turǵyny bar eldi meken tolyqtaı kóshkinniń astynda qaldy. Olardyń bári de ajal qushty. Pákistandyq qutqarýshylar eldiń soltústik-batysynda toǵyz adamnyń qaza tapqanyn habarlady. Birneshe adam qar qursaýynan shyǵa almaı, mashınanyń ishinde qalyp qoıǵan.
Naqty zardap shekkender sany anyqtalmady, sebebi kóptegen aýyldarmen baılanys úzilgen. Úzdiksiz jaýǵan qar men joldaǵy úıindiler barýǵa múmkindik bermeýde. Kabýl - Kandagar tas jolynda polıtsııa men sarbazdar qar qursaýynan 250-den astam mashınany qutqardy. Aýa raıy qalpyna kelgennen keıin, Nýrıstanǵa qutqarýshylardyń eki tikushaǵy jiberiledi. Kabýl halyqaralyq áýejaıy qazir jabyq, Salang ótkelindegi qozǵalys shekteldi.
Sınoptıkterdiń boljaýynsha, qolaısyz aýa raıy taǵy birneshe kúnge sozylady.
