Aýǵanstan men Ózbekstan 514,8 mln dollarlyq kelisimderge qol qoıdy
ASTANA. KAZINFORM – Kabýl qalasynda Aýǵanstan men Ózbekstan treıderleri jalpy somasy 514,8 mln AQSh dollaryna teń ózara túsinistik týraly memorandýmdarǵa qol qoıdy. Bul týraly Aýǵanstannyń Ónerkásip jáne saýda mınıstrligi málimdedi.
Aýǵanstan astanasynda ótken konferentsııa qorytyndysy boıynsha taraptar birqatar kelisimderge kelgen.
Vedomstvonyń habarlaýynsha, qol qoıylǵan kelisimder keń aýqymdy baǵyttardy qamtıdy. Atap aıtqanda, Aýǵanstanda broıler taýyqtaryn óndiretin kásiporyn qurý, tsement pen kómir saýdasy, burshaq daqyldary, mash, keptirilgen jemister men kókónister eksporttaý, sondaı-aq munaı, bıtým, mys jáne azyq-túlik ımporttaý qarastyrylǵan.
Mınıstrlik málimdemesinde Ónerkásip jáne saýda mınıstri Nurýddın Azızıdiń sózderi keltirilgen. Onyń aıtýynsha, taraptar segiz túrli aýǵan jáne alty túrli ózbek ónimderine qatysty preferentsııalyq tarıfter boıynsha kelisimge kelgen. Ózbekstan tarapy bul baǵyttaǵy segiz tarıftik pozıtsııany resmı túrde bekitken.
Yntymaqtastyq paketi sondaı-aq asfalt saýdasyn, alkogolsiz sýsyndar eksportyn, sport salasyndaǵy qyzmetterdi damytýdy jáne jumyrtqalaıtyn taýyq óndirisin qamtıdy. Bul taraptardyń ózara is-qımyldy dástúrli shekaralyq saýdadan tys ártaraptandyrýǵa umtylysyn kórsetedi.
Málimetke sáıkes, eki el arasyndaǵy yntymaqtastyq turaqty ósim qarqynyn kórsetip otyr. Aqpan aıynda aýǵan jáne ózbek kompanııalary 300 mln dollardan astam somaǵa 25 kelisim jasasqan, bul ekonomıkalyq baılanystardyń nyǵaıyp kele jatqanyn bildiredi.
2021 jyldyń tamyz aıynan keıin, bılikke qaıta kelgennen soń, Aýǵanstan úkimeti halyqaralyq seriktestermen, eń aldymen óńir elderimen saýda-ekonomıkalyq jáne tranzıttik yntymaqtastyqty keńeıtýge kúsh salyp otyr.
Eske salsaq, 2021 jyldyń tamyzynda «Talıban» qozǵalysy bılikke kelgennen keıin ózbek-aýǵan shekarasyndaǵy jaǵdaı kúrt shıelenisken. Tashkent qaýipsizdik sharalaryn kúsheıtip, óz aýmaǵyna aýǵan áskerı qyzmetkerleri mingen ondaǵan áskerı ushaq pen tikushaqty qabyldaǵan, sondaı-aq «Termez – Haıraton» ótkizý beketiniń jumysyn ýaqytsha toqtatqan.
Buǵan deıin Aýǵanstan men Ózbekstan tórt energetıkalyq joba boıynsha 243 mln dollar kóleminde kelisimsharttarǵa qol qoıǵany habarlanǵan edi.
Aıta keteıik, Memleket basshysy Qasym-Jomart Toqaev Aýǵanstanǵa kómek kórsetýdi jalǵastyrý qajet dep esepteıdi.
