Aýǵanstan memlekettik qorǵa SQO bıdaıyn satyp almaq
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Aýǵanstan elshisi Muhammad Farhat Azımımen kezdesip, eki jaqty kezdesý barysynda ózara yntymaqtastyq áńgime arqaýyna aınaldy, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, Soltústik Qazaqstanmen Aýǵanstan eli arasynda tyǵyz qarym-qatynas ornaǵan. Bıylǵy 6 aıda oblys shet memleketke 13 mln dollarǵa baǵalanatyn 60 myń tonna ónim jóneltti. Qumar Aqsaqalovtyń pikirinshe, alda eki jaqty tıimdi áriptestikti damytýǵa bar múmkindik jasalǵan.
«Bizdiń oblys úshin Aýǵanstan eksport boıynsha basty seriktes. SQO eksportynyń 28 % osy Aýǵanstanǵa tıesili. Biz sizderge bıdaı jáne maıly daqyldardy, undy jáne ekologııalyq taza ónim - bıoetanoldy jetkizýge daıynbyz»,- dedi Qumar Aqsaqalov.
Kezdesýde sóz alǵan Aýǵanstan elshisiniń aıtýynsha, olar memlekettik qordy qamtamasyz etý úshin Qazaqstannyń soltústiginen bıdaı alýǵa ázir.
«Bizge memlekettik qordy 4 jylǵa qamtamasyz etýimiz kerek. Ol úshin soltústikqazaqstandyq bıdaı men undy kóptep alýǵa daıynbyz. Qazir biz jylyna 1,6 mln tonna satyp ala alamyz. Sizdermen memorandým jasaıyq. Nátıjesinde Petropavlǵa kókónis, jemis-jıdek jáne basqa da taýarlardy jetkizetin bolamyz», - dedi Muhammad Farhat Azımı.
Soltústik óńirge qysqy ýaqytta Aýǵanstannan kókónis, jemis-jıdek jetkizý - oblystyń azyq-túlik qaýipsizdigin qamtamasyz etpek. Eki taraptyń pikiri bul kezdesý áriptestikti odan ári damytýǵa zor yqpal etedi degenge saıdy.
