Aýǵanstan máselesinde Qazaqstan tıimdi medıator bola alady — saıasattanýshy

ASTANA.KAZINFORM — Qazaqstan Aýǵanstandaǵy jaǵdaıdy retteý isinde tıimdi deldal bolýǵa erekshe múmkindikterge ıe. Bul týraly saıasattanýshy Azamat Baıǵalıev Bizdin Orta podkastynda málimdedi. 

— Álem Qazaqstan jalǵyz ózi Aýǵanstan máselesin sheshe alady dep oılaıtyndaı ańǵal emes. Bul máseleni ondaǵan jyl boıy búkil álem sheshe almady. Degenmen, bizdiń el osy baǵyttaǵy eń qolaıly medıator. Batys kelissóz júrgizýshilerin shartty túrde alańdatatyn jaıttar biz úshin mádenı kodtyń bir bóligi. Biz Aýǵanstanǵa kez kelgen basqa elge qaraǵanda áldeqaıda jaqynbyz, — dedi sarapshy.

Onyń aıtýynsha, Aýǵanstan uzaq ýaqyt boıy Ortalyq Azııadan aqparattyq turǵyda oqshaýlanyp keldi, biraq mádenı jáne demografııalyq turǵydan aımaqqa jaqyn.

— Onda til de, mádenıet te, tipti as ta uqsas. Aýǵan asyn tatqanda, bul — bizdiń taǵam ekenin sezesiń. Ókinishtisi, azamattarymyzdyń kópshiligi Aýǵanstannyń mádenıeti men halqy jaıynda az biledi, — dedi Baıǵalıev.

Saıasattanýshynyń pikirinshe, elimizde Aýǵanstan týraly kózqaras kóbine batystyq, keńestik jáne reseılik BAQ arqyly qalyptasty.

— Biz bul elge óz kózimizben óte sırek qaradyq. Qazir ony jańa qyrynan baǵalap, aımaǵymyzǵa yqpaldastyrý múmkindigi bar, — dep qosty ol.

Sarapshynyń aıtýynsha, álemdik turǵydan alǵanda, Aýǵanstan — Ortalyq Azııanyń bir bóligi. Sondyqtan kez kelgen, sonyń ishinde ekonomıkalyq sheshimder qabyldaýda aýǵan faktoryn eskergen jón.

Podkast-tyń tolyq nusqasyn kórermender 15 tamyzda saǵat 00:30–da «Jibek Joly» telearnasynan tamashalaı alady.

Aıta keteıik, Qazaqstan men Aýǵanstan birlesken ınfraqurylymdyq jobalardy jandandyrýǵa ýaǵdalasqan bolatyn.