Aýǵanstan, Qytaı, Reseı: Qazaqstan astyǵyn qaı elder kóbirek alyp jatyr
ASTANA. KAZINFORM — Qazaqstan astyǵynyń syrtqy naryqtarǵa tasymaly bıyl aıtarlyqtaı ósti. Jyl basynan beri temirjolmen, 2 mıllıon tonna astyq eksporttalǵan. Bul týraly Kólik vıtse-mınıstri Jánibek Taıjanov Úkimette baıandady.
— Bıyl 8 aıda temirjol arqyly 9,3 mıllıon tonna astyq tasymaldandy. Bul ótken jylmen salystyrǵanda 13 paıyzǵa kóp. Onyń ishinde eksportqa 7,2 mıllıon tonna, el ishinde — 2,1 mıllıon tonna tasymaldandy, — dedi J. Taıjanov.
Negizgi baǵyttar boıynsha ósim bar. Ortalyq Azııa elderine tasymal 37 paıyzǵa, Qytaıǵa — 34 paıyzǵa ósken. Reseıdiń Baltyq jáne Qara teńiz porttary arqyly tasymal 9 paıyzǵa artqan.
Aýǵanstanǵa astyq tasymaly 4,4 ese ósip, 655 myń tonnaǵa jetti.
— Óńdelgen ónim kólemi de ósip keledi. Qospa jem tasymaly 38 paıyzǵa ósip, 2,6 mıllıon tonnaǵa jetti. Jańa astyqty tasymaldaýǵa qajetti vagondar men lokomotıvter daıyn. Búginde 16 900 astyq vagony, 17 800 jabyq vagon jáne 2 myńnan astam lokomotıv bar. Bul ótken jylmen salystyrǵanda kóp. Qajet bolǵan jaǵdaıda qosymsha tolyqtyra alamyz, — dedi Kólik vıtse-mınıstri.
Aıta keteıik, búgin Úkimette kúzgi jıyn-terim jumystary qaralyp jatyr.
Ekologııa jáne tabıǵı resýrstar mınıstri Álibek Qýantyrov qazan men qarasha aılary ádettegiden jyly bolatynyn aıtty.
