Aýǵanstan Qazaqstanǵa astyq termınaldaryn salýdy usynyp otyr
«Aýǵanstanǵa astyq eksporty boıynsha bizde tıisti másele talqylanyp jatyr. Ekonomıkalyq yntymaqtastyq jónindegi Qazaqstan-Aýǵanstan komıssııasynyń teń tóraǵasy bolǵan kezimde ózara saýda jaǵdaıy talqylanǵany belgili. Sol kezde, ıaǵnı 5-7 jyl buryn aýǵan tarapy bizge Mazarı-Sharıfte astyq termınalyn, elevatordy salýdy usynǵan edi. Sonymen qatar Kabýldyń ózinde elevatordy salý usynysymen shyqty. Osy oraıda Aýǵanstanǵa jyl boıy astyq eksporttaýǵa múmkindik ashylady. Nege osy kúnge deıin Azyq-túlik kelisimshart korporatsııasy Aýǵanstanda bul máselemen aınalysýǵa nıetti emes?», - dep toqtaldy Vladımır Bojko Parlament Májilisi Agrarlyq máseleler komıtetiniń otyrysynda.
«Osy oraıda Aýǵanstan aýmaǵynda, sondaı-aq basqa da áleýetti naryqtarda astyq termınaldary men elevatorlaryn salý josparlanyp otyr ma?», - dep surady Májilis tóraǵasynyń orynbasary QR AShM men Azyq-túlik kelisimshart korporatsııasy ókilderine qaratyp aıtqan saýalynda.
Óz kezeginde QR Aýyl sharýashylyǵy vıtse-mınıstri Nurjan Áltaev jyl sońyna deıin aıaldaý bazalaryn keńeıtý men termınaldardy salý turǵysyndaǵy máseleler qarastyrylatynyn atap ótti.
«Qańtar aıynyń basynda bul máselege qatysty naqty jaýpty beremiz»,-dedi vıtse-mınıstr.
Budan buryn habarlanǵandaı , QR Aýyl sharýashylyǵy vıtse-mınıstri Nurjan Áltaev astyq eksportyna arnalǵan vagondardyń tapshylyǵy neden týyndaǵanyn túsindirgen bolatyn.
Buǵan Qazaqstannyń astyq vagondarynyń Aýǵanstan baǵytyndaǵy kepteliste qalyp qoıǵany sebep bolǵan.