Aýǵanstan energetıka salasyna ınvestorlar tartýdy josparlap otyr

KABÝL. QazAqparat – Aýǵanstannyń Energetıka jáne sý resýrstary mınıstrligi elektr energııasyn óndirý boıynsha 16 jobany anyqtady, dep habarlaıdy QazAqparat Ariana News agenttigine silteme jasap.

Mınıstrliktiń ókili Mavlavı Ahtar Mohammad Nasrattyń málimdeýinshe, 16 jobanyń 12-si jylý jáne kún energetıkasyna tıesili. Usynystar qarjy tartý úshin otandyq jáne Reseı, Iran, AQSh, Qytaı jáne Túrkııadan kelgen sheteldik ınvestorlarǵa berildi.

Qazirgi ýaqytta Aýǵanstan kórshi elderge elektr energııasy úshin jylyna shamamen 250 mıllıon dollar tóleıdi. Islam elinde birneshe gıdroelektrostantsııalardan, qazbaly otyn elektr stantsııalarynan jáne kún elektr stantsııalarynan barlyǵy 600 megavatt (MVt) elektr energııasy óndiriledi. Qosymsha 670 MVt Iran, Ózbekstan, Tájikstan jáne Túrkimenstannan ımporttalady.

Aıta keteıik, maýsym aıynyń basynda bılik Aýǵanstannyń Gerat qalasyna ottegi men maqta fabrıkalaryn salý úshin 4 mıllıon dollar ınvestıtsııa tartqan bolatyn.