Aýǵanstan bıyl esirtkige qarsy Ortalyq Azııa óńirlik aqparattyq úılestirý ortalyǵyna múshe bolýy múmkin
ALMATY. QazAqparat - Aýǵanstan bıyl Esirtki quraldary, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi Ortalyq Azııa óńirlik aqparattyq úılestirý ortalyǵyna múshelikke qabyldanýy múmkin.
Bul týraly búgin Almatyda Qazaqstan, Qyrǵyzstan, Tájikstan jáne Ózbekstannyń esirtkige qarsy vedomstvo basshylarynyń jumys kezdesýi barysynda belgili boldy.
«Qazir Aýǵanstan memleketin Esirtki quraldary, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi Ortalyq Azııa óńirlik aqparattyq úılestirý ortalyǵyna múshelikke qabyldaý máselesi talqylanyp jatyr. Ázirge bul memlekettiń ókili Ortalyq jumysyna baqylaýshy retinde qatysyp keledi», - dedi atalmysh ortalyqtyń aǵa sarapshysy Azamat Sabyrbekov.
Qazirgi tańda Ortalyq Azııa óńirlik aqparattyq úılestirý ortalyǵyna baqylaýshy retinde Aýǵanstanmen qatar, Germanııa, Italııa, Ulybrıtanııa, Kanada jáne AQSh elderi tirkelgen. Bolashaqta bul memleketter de atalmysh ortalyqtyń tolyqqandy múshelerine aınalýy múmkin.
Aıta ketelik, búgingi bas qosýda esirtki qylmysy boıynsha izdeý jarııalanǵan adamdar boıynsha Esirtki quraldary, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi Ortalyq Azııa óńirlik aqparattyq úılestirý ortalyǵynyń (OAÓAÚO) saıtynda ashyq derekter qoryn jasaý máselesi pysyqtaldy.
