Aýǵanstan astanasy Kabýlda joıqyn jarylys boldy
ASTANA. QazAqparat - Aýǵanstan astanasy Kabýl qalasynyń ortalyǵynda jarylys boldy. Reuters.com habarlaýynsha, 7 adam kóz jumǵan.
Lańkestik áreket aýyl-aımaqty damytý mınıstrligi mańynda bolǵan. Buqaralyq aqparat quraldarynyń málimetinshe, jankeshti ózin jaryp jibergen. Ol mınıstrlik qyzmetkerleriniń jumystan shyǵatyn ýaqytyn ádeıi kútip turǵan degen boljam bar.
«Lańkes ádeıi bizdiń mınıstrlikti kózdep kelgen sııaqty, týra qaqpanyń aldyna kelip, jarylys jasady. Sol ýaqytta barlyq qyzmetkerler úıge qaıtýǵa jınalyp, syrtqa shyqqan bolatyn»,-deıdi mınıstrlik ókili Freıdýn Ajand.
Al Saıd Ashraf esimdi Kabýl turǵyny jaralanǵandar arasynan ulyn izdep júr.
«Men munda balamdy izdep keldim. Ol osy mınıstrlikte jumys isteıtin. Aýrýhanadan da taba almadym. Ýaıymnan janym jaı tappaı tur», - deıdi sharasyz áke.
Ázirge bul áreketti eshqandaı terrorlyq uıym moınyna alǵan joq. Іske qatysty tergeý jumystary júrip jatyr.
