Aýǵandyq mıgrant salmen La-Mansh arqyly júzip ótpek bolǵan
ASTANA. QazAqparat - Frantsııanyń soltústigindegi Kale qalasynda jaǵalaý kúzetiniń qyzmetkerleri Aýǵanstannan kelgen zańsyz mıgrantty ustady.
Olar er adamdy ashyq teńizde Ulybrıtanııa baǵytynda La-Mansh buǵazyna qaraı júzip bara jatqan kezinde qolǵa túsirdi, dep habarlaıdy ITAR-TASS.
"Ol Kalege jaqyn jerde Sagnatt qalashyǵy jaǵalaýynyń mańynda Blan-Ne múıisine qaraı qalqyp júzip bara jatqan", - dep habarlady jergilikti qutqarý stansasynyń bastyǵy Bernar Barron. Onyń aıtýynsha, 23 jasar aýǵandyqty onyń qaramaǵyndaǵylar kúndiz taýyp, aman-esen jaǵalaýǵa jetkizgen.
Zańsyz mıgrant Ulybrıtanııaǵa qoldan jasalǵan úshburyshty saldyń kómegimen jetýge árekettengen, qurylysty jasaý úshin nebári alty taqtaı paıdalanǵan. Al saldy brezent qappen ǵana bekitken, ony oryndyq retinde de paıdalanǵan, al júzý quralynyń qozǵalýy úshin aq jaımadan jelken jasaǵan.
