Aýǵandyq fermerlerdi qoldaýǵa arnalǵan jemis aǵashtary jaıly kitap shyqty
ÁBÝ-DABI. QazAqparat - Aýyl sharýashylyǵy salasyndaǵy aýǵan mamandary Eýropalyq Odaqtaǵy áriptesterimen yntymaqtasa otyryp, jergilikti fermerlerdiń aýyl sharýashylyǵy alqaptarynyń ónimdiligin arttyrýǵa kómekke arnalǵan «Jemis aǵashtary boıynsha nusqaýlyq» kitabyn basyp shyǵardy.
Aýǵanstannyń aýyl sharýashylyǵy jáne sýlandyrý mınıstrligi vedomstvo basshylyǵy fermerlerge óz qyzmetteriniń tıimdiligin arttyrýǵa, saıyp kelgende, olardyń eńbegin tabysty etýge kómektesýge umtylyp otyrǵanyn atap ótti.
Kitapta toǵyz júzdeı ártúrli jemis aǵashtary týraly tolyqqandy aqparat berilgen, sonyń ishinde álemge jaqsy tanymal aýǵan badamgúliniń birneshe túri de qamtylǵan.
.Aýyl sharýashylyǵy jáne sýlandyrý mınıstri Mohammad Asef Rahımı «Jemis aǵashtary boıynsha nusqaýlyq» aýǵan ekonomıkasynyń basty bóligi bolyp tabylatyn jemisterdi eksporttaýǵa eleýli yqpal etedi dep sanaıdy. «Kitapta alma, júzim, badamgúl, shabdaly jáne basqa da jemis aǵashtary týraly baı materıaldar jınaqtalǵan, - dedi M.Rahımı jergilikti «Tolonıýs» telearnasyna bergen suhbatynda. Mysalǵa, oqý quralynda júzimniń 40-50 túri týraly aqparat keltirilgen jáne basqa da jemister týraly ǵylymı maǵlumattar mol.
EO-nyń Aýǵanstandaǵy elshisi Frants-Maıkl Mellbın Eýroodaq Aýǵanstannyń aýyl sharýashylyǵy sektoryn qoldaýǵa qatysyp otyrǵanyn atap kórsetti. Onyń aıtýynsha, aýyl sharýashylyǵy Aýǵanstannyń básekege qabiletti artyqshylyǵy bolmaq jáne el eger aýyl sharýashylyǵynyń joǵary tıimdiligine qol jetkizetin bolsa, álemdik naryqtaǵy iri oıynshyǵa aınalmaq. EO-nyń aýǵandyq aýyl sharýashylyǵyn qoldaý baǵdarlamasy 2020 jylǵa deıin eseptelgen.
