Aýǵan jaýyngerlerine arnalǵan eskertkishke gúl shoǵy qoıyldy
ASTANA. QazAqparat - Búgin Keńes áskeriniń Aýǵanstan Demokratııalyq Respýblıkasynan shyǵarylýyna 35 jyl toldy.
Ataýly kúnge oraı Astana qalasyndaǵy Aýǵanstanda qaza tapqan jaýynger-ınternatsıonalıstterge arnalǵan respýblıkalyq memorıalǵa gúl qoıyldy. Shara «Ólmeıtin rota» aktsııasy aıasynda ótkizildi, dep jazady astana.gov.kz.
Eskertkishke gúl qoıý rásimine Aýǵan soǵysynyń ardagerleri, qalalyq máslıhat, Úkimet pen Parlament, ortalyq memlekettik organdar men qoǵam ókilderi qatysty. Qaza tapqan jaýyngerlerge qurmet kórsetý úshin júzdegen turǵyn jınaldy.
Toǵyz jyldan astam ýaqytqa sozylǵan soǵysqa 600 000 jýyq KSRO azamaty qatysty, sonyń ishinde 22 000 qazaqstandyqtar.
Aýǵan soǵysy ardagerleri men múgedekteri odaǵynyń tóraǵasy Serik Kenjebekov óz sózinde árbir resmı bekitilgen ataýly kún óskeleń urpaqtyń boıynda patrıottyq sezimdi tárbıeleý úshin asa mańyzdy ekenin atap ótti. Jaýynger-ınternatsıonalıstterdiń batyl áreketteri elimizdiń árbir turǵynynyń júreginde máńgi saqtalýy kerek.
Atalǵan uıymnyń basty maqsaty - jastardy patrıottyqqa tárbıeleý, aýǵan soǵysy ardagerleri men múgedekteriniń máselelerine nazar aýdartý, Prezıdent pen Úkimettiń áleýmettik saladaǵy saıasatyn nasıhattaý, elimizdiń halqyn biriktirý. Aýǵan soǵysyna qatysýshylardyń ózderi - barlyq ulttardyń yntymaqtastyǵyna naǵyz úlgi.
Uıymdastyrýshylardyń aıtýynsha, odaqta osy múmkindikterdiń barlyǵy bar jáne oǵan memlekettik qoldaý men memlekettik áleýmettik tapsyrystyń arqasynda qol jetkizip otyrmyz.
Aıta keteıik, qazirgi kezde Astanada 1500 astam Aýǵan soǵysynyń ardageri turyp jatyr.
