Aýǵan soǵysynyń qatysýshysy, májilismen B.Smaǵuldyń kitaby boıynsha túsirilgen fılm kórermenderge jol tartty
ASTANA. 10 mamyr. QazAqparat - Astana qalasyndaǵy «Kerýen» saýda ortalyǵynyń kınozalynda QR Parlamenti Májilisiniń depýtaty,
Aýǵan soǵysynyń ardageri Baqytbek Smaǵuldyń «Men kórgen soǵys» kitabynyń jelisinde túsirilgen fılmniń tanystyrylymy ótti.
Kınokartınada Aýǵan soǵysynyń alyp kelgen qasiretteri baıandalady. 1980 jyldary Aýǵan dalasyna barǵan azamattyń araǵa jyldar salyp, naqty aıtqanda, 2011 jyly maıdan alańyna qaıta baryp, qaza tapqan qazaqstandyq jaýyngerlerdiń rýhyna taǵzym etýi kórinis tapqan. Ot pen órttiń, jalyndaǵan soǵystyń arasynda jazylǵan B. Smaǵuldyń óleńi oqylady.
Osy fılmniń rejısseri Tilegen Ahmet Mádenıet mınıstrligine, fılmniń ekranǵa shyǵýyna tikeleı qoldaý jasaǵan, aqyl-keńesin bergen «Qazaqfılm» kınostýdııasynyń prezıdenti, jazýshy Ermek Amanshaev myrzaǵa, otandyq kınostýdııanyń bas redaktory Dıdar Amantaıǵa jáne Aýǵanstandaǵy Qazaqstan Elshiligindegi azamattarǵa fılmdi túsirý tobynyń atynan alǵysyn jetkizdi.
Kórsetilim sońynda Halyq Qaharmany, QR Parlamenti Májilisiniń depýtaty Baqytjan Ertaev tebirenip sóz sóıledi. Ol bul týyndynyń patrıottyq tárbıesi mol ekendigin basa aıtty. «Soǵysta ádilettilik bolmaıdy. Aýǵan soǵysynyń ashylmaǵan qyr-syry kóp. Endigi jerde soǵys bolmasyn, mundaı qasiretti keıingi urpaq kórmesin. Táýelsiz memleketimizdiń aspany ashyq, keleshegi nurly bolsyn!»- dedi Halyq Qaharmany Baqytjan Ertaev.
