Aýǵan soǵysynyń aıaqtalǵanyna 22 jyl
ALMATY. 15 aqpan. QazAqparat /Áıgerim Ámir/ - Búgin Almatydaǵy 28-gvardııashy-panfılovshylar atyndaǵy saıabaqta Aýǵanstandaǵy soǵystyń aıaqtalǵanyna 22 jyl tolýyna oraı shara ótkizildi.
Uıymdastyrýshy - Aýǵan soǵysy ardagerleriniń úılestirý jáne jergilikti áskerı shıelenister keńesi.
«Biz sol soǵysta qaza bolǵan otandastarymyzdy umytpaımyz.. Olardyń erlikteri jaıly biz árdaıym aıtyp júremiz. Ondaǵy basty maqsatymyz - óskeleń urpaqty otansúıgishtikke tárbıeleý, el isine etene aralastyrý, jalpy memleket aldyndaǵy boryshyn adal jolmen atqarǵan azamattardyń erligin jastarǵa pash etý» - deıdi «Ardager» aýǵan soǵysy ardagerleri men múgedekteri qoǵamdyq birlestiginiń tóraǵasy Serikbaı Baımoldınov.
Atalmysh shara saltanatty túrde ótti. Jınalǵan jurt máńgilik alaý men Aýǵanstanda qaıtys bolǵandardyń eskertkishine gúl shoqtaryn qoıdy. Dástúrli túrde mıtıng ótip, sońynda alǵys hattar, medaldar tapsyryldy. Sondaı-aq, soǵys ardagerleri qurmetine áskerı ánder oryndaldy.
Qazaqstannan bul soǵysqa 22 296 adam attanǵan. Solardyń ishinde 924 jaýynger qaza tapty. Al, 21-i habar-osharsyz ketken. Búginde Qazaqstan boıynsha 17 myńnan astam aýǵan soǵysynyń ardageri bar.
