Aýǵan soǵysynyń ardagerleri Uly Otan soǵysy múgedekterine arnalǵan klınıkalyq gospıtaldiń jabylýyna narazylyq bildirýde
ALMATY. 10 qarasha. QazAqparat /Ádilet Musahaev/ - Búgin Almatyda aýǵan soǵysynyń ardagerleri Uly Otan soǵysy múgedekterine arnalǵan respýblıkalyq klınıkalyq gospıtaldiń jabylýyna narazylyq bildirip, baspasóz máslıhatyn ótkizdi.
Atalǵan emdeý ornynda UOS men Aýǵan soǵysy múgedekteri, Chernobyl apaty jáne Semeı polıgonynan zardap shekkender em qabyldap kelgen.
"Aýǵan soǵysy múgedekteri" erikti qoǵamynyń tóraǵasy Altynbek Tanybaevtyń aıtýynsha, 11 gektar aýmaqty alyp jatqan bul emdeý ortalyǵy 2010 jyldyń 31 tamyzynan bastap óz jumysyn toqtatqan jáne ondaǵy emdeý apparattary qoımalarǵa ótkizilgen.
"Densaýlyq saqtaý mınıstrliginen kelgen hatshy bul ǵımaratta jer silkinisinen jaryqsha paıda bolǵandyǵyn aıtyp, onyń ornyna sońǵy úlgidegi jańa emdeý ortalyǵyn salyp beremiz dep ýáde etken bolatyn. Alaıda odan beri ol jerde esh qurylys salynyp jatqan joq", - deıdi A. Tanybaev.
Ardagerler burynnan emdelip kelgen emdeý ortalyǵynyń ózderine qaıtarylýyn talap etýde. Sondaı-aq olar ádemi tabıǵat aıasynda ornalasqan emdeý ortalyǵynyń jeri saýdalanyp kete me degen kúdikterin de jasyrmady.
