Aýǵan soǵysynyń ardagerleri otansúıgishtik tárbıeni nasıhattamaq
Atalǵan shara barysynda sóz sóılegen vıtse-mınıstr Din isteri jáne azamattyq qoǵam mınıstrliginiń qyzmeti týraly, onyń ishinde din, azamattyq qoǵamdy nyǵaıtý jáne jastar saıasaty salalarynda atqarylyp jatqan jumystarǵa toqtalyp ótti.
Abzal Núkenov din salasynda jastardyń teris dinı aǵymdarǵa kirý áreketiniń jalǵasýy qoǵamdaǵy basty máselege aınalǵandyǵyn atap ótti. Onyń aıtýynsha, qazirgi ýaqytta jastar men turǵyndar arasynda dinı ekstremızm men radıkalızmge jol bermeý maqsatynda 3,5 myń adamnan turatyn 250 aqparattyq-túsindirý toptary turaqty jumys júrgizýde.
Bul rette, vıtse-mınıstr aýǵan soǵysy ardagerlerin din salasyndaǵy memlekettik saıasattyń negizderin, zańnamalyq ózgerister men dástúrli dinniń rýhanı-tanymdyq qundylyqtaryn túsindirýde, sondaı-aq, jastar arasynda radıkaldyq kórinisterdiń aldyn alýda birlesip belsene jumys jasaýǵa shaqyrdy.
Vıtse-mınıstr azamattyq qoǵam salasynda mınıstrlik tarapynan Memleket basshysynyń «Rýhanı jańǵyrý» baǵdarlamasy aıasynda «Atameken» kishi baǵdarlamasy iske asyrylyp otyrǵandyǵyn baıandady. Atalǵan baǵdarlama óńirlerdegi ózekti máselelerdi sheshýge azamattardyń, qoǵamdyq birlestikterdiń, bıznes ókilderi men memlekettik organdardyń kúshin biriktirýge baǵyttalǵan.
QR Din isteri jáne azamattyq qoǵam vıtse-mınıstri Abzal Núkenovtiń aıtýynsha, jastar arasynda patrıottyq tárbıeni damytý jáne nasıhattaý maqsatynda «Jastar men jasóspirimderdi patrıottyq tárbıege baýlý jáne mádenıetti qalyptastyrý», «Jiger» áskerı-patrıottyq lagerin uıymdastyrý» taqybyndaǵy áleýmettik jobalar júzege asyrylýda.
Aıta keteıik, ardagerler seziniń jumysyna Qazaqstandaǵy Aýǵan soǵysy ardagerler uıymdary Assotsıatsııasynyń tóraǵasy Baqytbek Smaǵul, Qazaqstan Respýblıkasy ardagerler uıymdarynyń ortalyq Keńesi tóraǵasy Baqtyqoja Іzmuhambetov, «Qarýly Kúshter ardagerleri» RQU tóraǵasy Muhtar Altynbaev, sondaı-aq, óńirlerdegi «Aýǵan soǵysy ardagerleri men múgedekteri» qoǵamdyq uıymdarynyń jetekshileri qatysty.
