Aýǵan soǵysynyń ardagerleri arasynda halyqaralyq jarys uıymdastyrylady
TALDYQORǴAN. QazAqparat - Tuńǵysh ret Almaty oblysy ákiminiń tikeleı qoldaýymen aýǵan soǵysynyń ardagerleri arasynda halyqaralyq jarys uıymdastyrylady. Búgin bul jóninde óńir basshysynyń ınternatsıonalıst-jaýyngerlermen kezdesýi barysynda málim boldy dep, habarlaıdy QazAqparat tilshisi.
Qazirgi ýaqytta aýǵan soǵysynyń ardagerleri erlikpen qaza tapqan qatarlastaryn óskeleń urpaqqa úlgi etý, nasıhattaý maqsatynda túrli sporttyq sharalar uıymdastyryp keledi. Oblys ákimine aldaǵy ýaqytta osyndaı jarystardyń ótýine qoldaý bildirýin surady. Usynysty birden qabyldaǵan óńir basshysy Amandyq Batalov fýtbol jáne voleıboldan halyqaralyq jarys uıymdastyrý jóninde tıisti mamandarǵa tapsyrma berdi.
«Búginde ardagerlerdiń biri jas urpaqqa áskerı-patrıottyq tálim-tárbıe berse, endi biri ónerkásip, óndiriste, shaǵyn jáne orta bıznes salasynda oblystyń ekonomıkalyq-áleýmettik damýyna úles qosýda. Osy oraıda, Sizderge bolashaq urpaq, jastardy Otandy súıý, eljandylyqqa tárbıeleý isindegi azamattyq qyzmetterińiz úshin shynaıy rızashylyq bildiremin», - dedi A. Batalov óz sózinde.
Sondaı-aq, oblystyq Aýǵan soǵysy ardagerleri uıymdarynyń úılestirý keńesiniń tóraǵasy Erjan Danabekov sóz alyp, birqatar máselelerge toqtaldy. Atap aıtqanda, medıtsınalyq uıymdarda «Aýǵan soǵysy ardagerleri kezeksiz qabyldanady» degen taqtaısha ilinip, kezeksiz qabyldaý, sanatorlyq-kýrorttyq joldamalar alýdaǵy aýǵandyqtardyń úles-salmaǵyn arttyrý, ardagerler men olardyń jesirlerin turǵyn úımen qamtý máselelerin kóterdi. Máselen, osy kezdesýge qatysqan aýǵan soǵysy ardageriniń jesiri, ekinshi toptaǵy múdegek Marjan Bazarovanyń Dárigerlik-eńbektik sarapshylyq komısııadan ótýdegi kedergileri, áli kúnge turǵyn úıge qol jetkize almaı júrgeni aıtyldy. Oblys ákimi A. Batalov tıisti mekeme basshylaryna máselelerdi qarastyrý týraly tapsyrma berdi. Sondaı-aq E. Danabekov áke-sheshesinen birdeı aıyrylǵan, oblys ákiminiń grantymen joǵary oqý ornynda oqyp jatqan Tolǵanaı Súleımenovanyń stıpendııa almaıtyny da qıyndyq týǵyzyp otyrǵanyn jetkizdi. Bul máseleni sheshýdi oblys ákimi qala basshysy B. Qarasaevqa tapsyrdy.
Sóz alǵan aýǵan soǵysyna qatysýshylar jeke kásipkerlikke qoldaý kórsetý, qoǵamdyq kólikte tegin júrý, tabıǵı gaz qostyrýda jeńildikter qarastyrý máselelerdi qamtydy.
Barlyq usynystardy muqııat tyńdaǵan oblys ákimi árbir saýalǵa tyńǵylyqty jaýap berip, densaýlyq saqtaý, sport, jolaýshylar kóligi, aýyl sharýashylyǵy, qurylys, jumyspen qamtý, bilim salalarynyń basshylaryna atalǵan máselelerdi sheshý tetikterin qarastyrý, is-sharalar josparyna engizý, naqty sharalar qabyldaýdy tapsyrdy.
