Aýǵan soǵysynda mert bolǵan sarbazdardyń analaryna qurmet kórsetildi
ASTANA. 20 mamyr. QazAqparat - Keshe, Qazaqstannyń Aýǵan soǵysy ardagerleri qaýymdastyǵynyń IV sezin bastamas buryn oǵan qatysýshy azamattar tik turyp, osy soǵysta qaza bolǵan sarbazdardyń analaryna qurmet kórsetti.
Astanada osyndaı 12 otbasy bar eken. Olardyń biri - Kım januıasy. Aýǵan soǵysynda jalǵyz balasynan aıyrylǵan Nadejda Kım taǵy úsh anamen birge sezd jumysyna qatysty. Qazaqstan Respýblıkasy Ardagerler uıymdary úılestirý keńesiniń tóraǵasy, Halyq Qaharmany, Parlament depýtaty Baqytjan Ertaev olarǵa jyly lebizderin jetkizip, gúl men arnaıy syı-syıapattaryn tabys etti. «Biz - «Ana!» degende tik turyp, bas ıetin halyqpyz, ananyń aq súti úshin máńgilik qaryzdar ekenimizdi jaqsy túsinetin elmiz. Mine, bizdiń aldymyzda analar tur. Átteń, biz olardyń jan jarasyn jaza almaımyz. Biz olardyń aldynda bas ıip, máńgilik qurmet kórsetýge mindettimiz», - deıdi B.Ertaev.
