Aýǵan soǵysynda erlik kórsetken qazaqstandyqtar týraly fılm túsiriledi - M. Qul-Muhammed
ASTANA. Qarashanyń 18-i. QazAqparat /Qanat Mámetqazyuly/ - Aldaǵy ýaqytta aýǵan soǵysynda erlik kórsetken qazaqstandyqtar týraly fılm túsiriledi.
Búgin QR Mádenıet jáne aqparat mınıstrliginiń keńeıtilgen alqa májilisi barysynda mınıstr Muhtar Qul-Muhammed Elbasynyń atyna tikeleı jelide kelip túsken saýaldarǵa toqtala kele, osylaı málim etti, dep habarlaıdy QazAqparat.
«Elbasy atyna kelip túsken saýaldardyń bir parasy ulttyq kınony damytýǵa qatysty boldy. Jalpy, búgingi kúni «Qazaqfılm» kınostýdııasynyń jumysyn tolyq qaıta jańǵyrtýdyń birinshi kezeńi aıaqtaldy. Nátıjesinde, «Qazaqfılm» kınostýdııasy sandyq júıege kóshetin bolady. Sonymen birge, osy ýaqytqa deıin biz túsirilgen fılmderdiń barlyǵyn zamanǵa saı óńdeý, dybys jazý, montajdaý jumystaryn shetelde jasap kelsek, endigi kúni ózimizdiń kınostýdııamyzda júrgize alatyn jaǵdaıǵa jetkeli otyrmyz. Sonymen qatar, tuńǵysh ret ulttyq mýltıplıkatsııalyq 1 saǵattyq fılmder jasaýǵa kiristik. Bul shyndyǵynda el tarıhynda tuńǵysh ret júzege asqaly otyrǵan mańyzdy shara», dedi M. Qul-Muhammed. Mınıstrdiń aıtýynsha, byltyrdan beri onshaqty kórkem fılmder, qysqa metrajdy 5 onımatsııalyq fılmder túsirilgen. Kelesi jylǵy jumys jospary budan da aýqymdy bolyp tabylady.
«Qazaqstan kınematografııasynan túlep ushqan, shetelderde ájeptáýir bedelmen qyzmet istep jatqan azamattardyń qatysýymen birshama jospardy júzege asyratyn bolamyz. Atap aıtqanda, Tımýr Bekmambetovtyń rejısserlyǵymen «Altyn adam» atty fılm túsirý josparda bar. Budan basqa, belgili rejısser Egor Konchalovskııdiń atsalysýymen aýǵan soǵysynda erlik kórsetken qazaqstandyqtar týraly fılm túsiriledi. Ázirshe, ol fılmge «Qara maıor» nemese «Naǵyz polkovnık» degen shartty, jumys babyndaǵy ataýlar berilip otyr», dedi M. Qul-Muhammed.
