Aýǵan soǵysyna qatysqandarǵa baspanany óteýsiz jekeshelendirý qaıtaryla ma
ASTANA. QazAqparat - Búgin Parlament Májilisiniń jalpy otyrysynda depýtat Jambyl Ahmetbekov jaýynger-ınternatsıonalısterge baspany óteýsiz jekeshelendirý jeńildikterin qaıtarýdy surady, dep habarlaıdy QazAqparat.
Bul turǵyda depýtattyq saýal QR Eńbek jáne halyqty áleýmettik qorǵaý mınıstri Tamara Dúısenovaǵa joldandy.
Depýtattyń atap ótýinshe, qazirgi kezde qoldanystaǵy «Turǵyn úı qatynastary týraly» QR Zańynyń 13 baby 8 tarmaǵynda memlekettik turǵyn úı qorynan alǵan baspanany aqysyz menshikke alýǵa quqyly adamdardyń sanatyna UOS ardagerleri men múgedekteri, Chernobyl atom elektr stansasyndaǵy apattyń saldaryn joıýǵa qatysqandar, sondaı-aq ıadrolyq synaqtarǵa qatysqandar jáne jeńildik sharalary eskerilgen basqa da sanattar qamtylǵan. ıAǵnı bul adamdarǵa baspanany tegin jekeshelendirý quqyǵy berilgen. Al basqa elderdiń aýmaǵynda jaýyngerlik is-qımyldarǵa qatysqandar atap kórsetilmegen.
Jambyl Ahmetbekovtiń sózine qaraǵanda, 2012 jylǵa deıin kúshinde bolǵan zańnamanyń normalary jaýynger-ınternatsıonalısterge memlekettik turǵyn úı qorynan alǵan baspanany qaıtarymsyz jekeshelendirýge múmkindik berdi. Turǵyn úı zańnamasyna ózgeristerdi ázirleý kezinde bul normalar qamtylmaı qalǵan.
Osy oraıda ol Qazaqstan jeńildik berilgen adamdardyń barlyq sanattaryn qajetti sharalarmen qamtamasyz etý boıynsha halyqaralyq mindettemeni ózine alǵanyn jáne tıisti qujattarǵa qol qoıǵanyn eske salyp ótti.
«Reseıde, Qyrǵyzstanda, Ózbekstanda Aýǵan soǵysynyń ardagerlerine jeńildikterdi saqtap qaldy, onyń ishinde baspanany aqysyz jekeshelendirý sharalary eskerilgen. Osyǵan baılanysty Úkimetten atalǵan azamattardyń máselesi boıynsha tolyqtyrýlar engizý týraly zańnamalyq bastamamen shyǵýdy suraımyz», - dedi J. Ahmetbekov.
