Aýǵan soǵysy ardagerlerine turǵyn úıin jekeshelendirý múmkindigi pysyqtalýda

ASTANA. QazAqparat – Aýǵan soǵysy ardagerlerine turǵyn úıin jekeshelendirý múmkindigin berý máselesi pysyqtalyp jatyr. Bul jaıynda Senat depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Turǵyn úı qatynastary týraly» Zańnyń 68-babyna sáıkes, basqa memleketterdiń aýmaǵyndaǵy urys qımyldarynyń ardagerleri halyqtyń áleýmettik jaǵynan osal toptar qataryna jatqyzylǵan. Sondaı-aq, atalǵan Zańynyń 13-baby 8-tarmaǵynyń 5) tarmaqshasyna sáıkes, Aýǵanstanda nemese urys qımyldary júrgizilgen basqa da memleketterde áskerı qyzmetin ótkerý kezinde jaralanýy, kontýzııa alýy, mertigýi saldarynan bolǵan múgedektigi bar adamdar dep tanylǵan áskerı qyzmetshiler Memlekettik turǵyn úı qorynan ózderi turatyn turǵyn úılerdi menshigine tegin alýǵa quqyǵy bar», - dedi Tamara Dúısenova jaýabynda.

Onyń atap ótýinshe, qazirgi tańda «Turǵyn úı saıasatyn reformalaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańynyń jobasy ázirlenip, Májilistiń qaraýyna engizilgen.

«Atalǵan zań jobasy aıasynda buryn jalǵa berilgen turǵyn úıdi satyp alý quqyǵymen jekeshelendirýge ruqsat berýge Qazaqstan Respýblıkasy Parlamenti Májilisiniń depýtattary bastamashylyq jasaýda. Joǵaryda baıandalǵannyń negizinde, aýǵan soǵysy ardagerlerine turǵyn úıin jekeshelendirý múmkindigin berý máselesi joǵaryda atalǵan zań jobasy aıasynda ýákiletti memlekettik organmen pysyqtalýda. Másele ýákiletti organ men Úkimettiń turaqty baqylaýynda»,- dedi mınıstr.