Aýǵan soǵysy ardagerleri qarýlastaryn eske aldy
ALMATY. Tamyzdyń 14-i. QazAqparat /Erbol Turymbetov/ - Búgin Almatyda Aýǵan soǵysy ardagerleri qaýymdastyǵy sol soǵysta qaza tapqan joldastaryn eske alyp, ardagerlerdiń áleýmettik máselelerine arnalǵan konferentsııa ótkizdi,
dep habarlaıdy QazAqparat.
Otyrysta «Aýǵan soǵysyna qatysýshylar týraly» zańnyń qabyldaný qajettiligi talqylandy. Aýǵan soǵysy ardagerleri men múgedekteri úılestirý keńesiniń tóraǵasy Murat Abdýshkýrovtyń aıtýynsha, ardagerler on jyl boıy osy áńgime tóńireginde másele kóterip keledi. «Qazirgi tańda Aýǵan ardagerleri men múgedekteriniń máselelerin kóterýde bizge birige jumys isteý mańyzdy bolyp otyr», deıdi ol.
Jıynǵa deıin qatysýshylar Almatydaǵy 28 gvardııashy-panfılovshylar parkinde Aýǵan soǵysyndaǵy bozdaqtardy eske alyp, gúl şoqtaryn qoıý rásimin ótkizdi.
