Aýǵan soǵysy ardageriniń taǵdyry týraly otbasylyq drama kórsetiledi
NUR-SULTAN. QazAqparat - «Habar» telearnasynyń tapsyrysymen túsirilgen «Kebenek» atty otbasylyq drama janryndaǵy telehıkaıa kórermenge jol tartpaq. Týyndyda qyryq jyl qyrǵyn bolsa da ajalsyz ólmeıdiniń kebin kıgen Aýǵanstan soǵysy ardageriniń ómiri sýretteledi. Atalmysh dramany 4 qarashadan bastap «Habar» telearnasynan tamashalaı alasyzdar.
Aýǵan soǵysynyń ardageri Jasuzaq Quraqbaıuly aýdan, oblys kólemine tanymal azamat. Minezi salmaqty, aıtqanynan qaıtpaıtyn qaısar minezdi, batyl, erjúrek adaldyǵy men adamgershiligin el moıyndaǵan jigit. Tar jol taıǵaq keshýden taısalmaı ótken taǵdyry bar,búginde aýyl mektebiniń áskerı páni muǵaliminiń ǵumyry - «Kebenek» týyndysyna arqaý bolady.
Aýǵanstan. 1988 jyl. Kezekti tapsyrma boıynsha jaý tylyn baqylaý úshin bir top barlaýshylar sholǵynǵa shyǵady. Alaıda mına jasyrylǵan soqpaqta jarylysqa tap bolady. Barlaýshylar shebindegi búkil sarbazdar qaza bolyp, tek Jasuzaq aman qalady. Jarylys týraly málimet ortalyqqa jetisimen, tikushaq jedel túrde oqıǵa ornyna kelip qonady. Sanıtarlar qaza bolǵandardyń máıitterin asyǵa tıeı bastaıdy. Jarylystyń tolqynymen shalǵaı jaqqa ushyp, es-tússiz jatqan Jasuzaqqa kezek kelgen kezde - tikushaq komandıri salmaq artyqtyǵyn, tikushaqtyń kótere almaıtyndyǵyn aıtyp, toqtaý salady. Sanıtar komandırdiń berilgen nusqaýymen Jasuzaqtyń qoınyndaǵy qujattaryn apyl-ǵupyl alyp, onyń óli-tirisin anyqtamastan tikushaqqa janushyra júgiredi. Esin jıǵan Jasuzaq áýedegi tikushaqty kórip, jat jerde jalǵyz qalǵanym ba dep oılap úlgergeninshe kóktegi tikushaq jarylyp, kúl talqany shyǵady. «Kórer jaryǵym bar eken ǵoı», - dep kúbirlep jatyp talyqsyp ketken Jasuzaq esinen tanady.
Aýylyna Jasuzaqtyń tabyty saltanatty túrde kelip, jerleý rásimi ótedi. Onyń erlik jolynda qaza bolǵany úshin «Qyzyl ordendi» ákesi Quraqbaıdyń keýdesine qadap ketedi. Basyna eskertkish qoıylyp, kósheniń aty beriledi. Búkil aýyl Jasuzaqty óldige sanap júrgenimen, tek aqsaqal balasynyń tiri ekendiginen úmit úzbeıdi. Aýzynan qaıda júrse de «Kebenegim» keledi deıtin sózin tastamaıtyn Quraqbaı shaldy kórgen kópshilik aýrýǵa balaǵaly qashan...
Aqsaqaldyń úkilegen úmiti aqtalyp, Aýǵan soǵysyndaǵy jarylystan keıin «ólige» sanalǵan «Kebenek» aman-esen eline oralar ma eken? Óldige sanalǵan, alaıda tiri qalǵan Jasuzaqtyń endigi taǵdyry ne bolmaq?!
Qatal taǵdyr tálkegine toly «Kebenek» dramasyn 4 qarashadan bastap, «Habar» telearnasynan tamashalańyzdar.
Telehıkaıada basty rólderdi Meıirǵat Amangeldın, Farıza Eskermes, Erbol Semqulov, Erjan Jyrylqasynov, Altynaı Nógerbek, Ámına Orazbaı, Tamırıs Janǵazınova jáne t.b. akterlar somdaıdy.
