Aýǵan daǵdarysy kórshi memleketterdegi jaǵdaıdy ýshyqtyrady – Sergeı Lavrov

TAShKENT. QazAqparat – Aýǵan daǵdarysy shekaralas memleketterdegi terrorıstik qaterdi jáne esirtkiniń zańsyz aınalymy problemasyn shıelenistirip, buryn-sońdy bolmaǵan deńgeıge jetti. Bul týraly Reseı Federatsııasynyń Syrtqy ister mınıstri Sergeı Lavrov «Ortalyq jáne Ońtústik Azııa: aımaqtyq ózara baılanys. Syn-qaterler men múmkindikter» atty halyqaralyq konferentsııanyń plenarlyq otyrysynda aıtty, dep habarlaıdy QazAqparat.

Onyń aıtýynsha, Aýǵanstandaǵy jaǵdaı ýshyǵyp, qazirgi jaǵdaıda kórshiles memleketterge salqynyn tıgizýi múmkin.

«AQSh pen NATO kontıngentteriniń asyǵys shyǵarylýyna baılanysty osy eldegi jáne onyń aınalasyndaǵy áskerı-saıası jaǵdaıdyń damýyndaǵy belgisizdik kúrt ósti. Aýǵan daǵdarysy shekaralas memleketterdegi terrorıstik qaterdi jáne buryn-sońdy bolmaǵan deńgeıge jetken esirtkiniń zańsyz aınalymy problemasyn shıelenistiredi»,– dedi S.Lavrov.

Reseı SІM basshysy Aýǵan qaqtyǵysyn beıbit jolmen rettegennen keıin ǵana Aýǵanstandy óńirlik yntymaqtastyqqa tolyqqandy tartý múmkin bolatynyn aıtty.

«Ortalyq jáne Ońtústik Azııany baılanystyratyn kóliktik-logıstıkalyq jáne energetıkalyq jobalardy ilgeriletý josparlary qaýipsizdik jaǵdaıyn tolyq kólemde eskerýi tıis. Tek aýǵanishilik janjaldy jan-jaqty rettegende ǵana Kabýldyń qatysýymen ekonomıkany qosa alǵanda, barlyq bastamalardy tabysty júzege asyrýǵa bolady», – dedi S.Lavrov.

Esterińizge sala keteıik, 15-16 shildede Tashkentte «Ortalyq jáne Ońtústik Azııa: aımaqtyq ózara baılanys. Syn-qaterler men múmkindikter» atty halyqaralyq konferentsııa ótip jatyr. Oǵan Ózbekstan prezıdenti Sh. Mırzıeev, Aýǵanstan prezıdenti Ashraf Ǵanı, Pákistannyń premer-mınıstri Imran Han, Eýrokomıssııanyń vıtse-prezıdenti Jozep Borrel, Ortalyq Azııa, RF, Úndistan, Qytaı elderiniń Syrtqy ister basshylary qatysýda.