Aýǵan bosqyndary Germanııaǵa kirmeý úshin usynylǵan aqshalaı ótemaqyny qabyldamady

ASTANA. KAZINFORM — Germanııa ІІM-niń aýǵandarǵa elge kirmeýden bas tartqany úshin aqsha usyný jospary is júzinde sátsiz boldy, dep habarlaıdy BILD.

Pákistanda Germanııaǵa ushýdy kútip otyrǵan shamamen 700 aýǵannyń ishinen bul usynysty óte az adam ǵana qabyldaǵan. Kabul Luftbrücke gýmanıtarlyq uıymynyń ókili Eva Beıerdiń aıtýynsha, bar bolǵany bes otbasy bolýy múmkin.

Bastamanyń maqsaty — Germanııaǵa qabyldanatyny týraly resmı ýáde alǵan aýǵan azamattaryna aqshalaı tólem berý arqyly elge kirýden óz erkimen bas tartýdy usyný.

Bul usynystan bas tartqandarǵa tekserýlerdiń uzaqqa sozylatyny jáne bolashaqta Germanııaǵa kirý quqyǵynan aıyrylýy múmkin ekeni eskertilgen. Alaıda kópshiligi baǵdarlamalarda qalyp, Germanııa bıliginiń sheshimin kútýdi tańdady.

Pákistan aýǵandardyń osy jyldyń jeltoqsan aıynyń sońyna deıin elde qalýyna ruqsat berdi, biraq Germanııa olardy evakýatsııalaýǵa úlgermese, jergilikti bılik olardy Aýǵanstanǵa deportatsııalaýdy bastaı alady.

Býndestag depýtaty, «Jasyldar» partııasynyń múshesi Shahına Gambır úkimettiń bul usynysyn «tsınızm jáne moraldyq azǵyndaý» dep atady.

— Úkimet tálip ókilderin Germanııaǵa dıplomat retinde shaqyryp jatqanda, olar qýdalap otyrǵan adamdarǵa qaýipsizdikten bas tartýdy aqshaǵa usynyp otyr, — dedi ol.

Buǵan deıin Konstants ýnıversıtetiniń mıgratsııa jónindegi sarapshysy Danıel Tım sırııalyqtardyń basym bóligi Germanııada máńgi qalatynyn aıtqan edi.

Sondaı-aq, Germanııada mıgranttar eń kóp jumys isteıtin mamandyqtar anyqtaldy.