Aýǵan bıligi ınternetke tyıym salynǵany týraly aqparatty joqqa shyǵardy

ASTANA. KAZINFORM — Aýǵanstan bıligi el aýmaǵynda ınternetke kirýge tyıym salynǵany týraly aqparatty resmı túrde joqqa shyǵaratynyn málimdedi, dep jazady Anadoly.

Resmı málimdemege sáıkes, baılanys júıesindegi úzilister — eski talshyqty-optıkalyq kabelderdiń tozýy men olardy aýystyrý jumystarymen baılanysty.

Ákimshilik ókilderi pákistandyq jýrnalısterge bergen túsiniktemesinde, zaqymdanǵan kabelder qazirgi ýaqytta aýystyrylyp jatqanyn habarlaǵan.

— Biz ınternetke tyıym saldyq degen qaýesetter shyndyqqa janaspaıdy, — dep naqtylady resmı tulǵalar.

Buǵan deıin birneshe halyqaralyq jáne jergilikti BAQ Aýǵanstanda birneshe saǵat boıy ınternet pen telekommýnıkatsııalyq qyzmetter qoljetimsiz bolǵanyn habarlaǵan edi.

Flightradar24 qyzmetiniń málimetinshe, Kabýl halyqaralyq áýejaıynda baılanys aqaýlaryna baılanysty keminde segiz reıs toqtatylǵan.

Sondaı-aq, jergilikti basylymdar keıbir qalalarda birneshe apta boıy bıliktiń sheshimimen talshyqty ınternet óshirilip jatyr degen habar taratqan bolatyn.