Aýǵan áıelderine ýnıversıtette oqýǵa tyıym salyndy

ASTANA. QazAqparat – Aýǵanstanda (Qazaqstanda ekstremıstik dep tanylǵan jáne tyıym salynǵan) bıliktegi Talıban qozǵalysy aýǵan áıelderiniń budan bylaı ýnıversıtette oqı almaıtynyn málimdedi, dep habarlaıdy QazAqparat VVS aqparat agenttigine silteme jasap.

Áıelderdiń ýnıversıtetterge kirýine shekteý birden kúshine enedi jáne bul shekteýdiń qansha ýaqytqa sozylatyny belgisiz, delingen eldiń bilim mınıstrligi taratqan málimdemede.

Aýǵanstandaǵy áıelder únemi bilim alý múmkindiginen aıyrylady.

Ótken jyly tálipter qyzdardyń orta mektepterge barýyna tyıym salǵan.

Bıyl naýryz aıynda tálipter qyzdar mektebiniń jaqyn arada ashylatyny týraly birneshe habarlama jibergennen keıin sheteldik úkimetterdiń synyna ushyrap, aqyry olardy jabýly kúıinde qaldyrdy.

Aýǵanstan JOO-na oqýǵa túsý emtıhany úsh aı buryn ótti. Oqýǵa túskender arasynda myńdaǵan qyzdar bar.

Biraq olar oqı alatyn pánder men mamandyqtarǵa qatań shekteý qoıylǵan: áıelderge veterınarııa, ınjenerııa, ekonomıka jáne aýyl sharýashylyǵy mamandyqtaryn meńgerýge tyıym salyndy, al jýrnalıstıkaǵa qatań shekteý bar.

Ótken jyly Talıban Aýǵanstandaǵy bılikti basyp alǵannan beri ýnıversıtetter bólek oqý aqysyn engizip, erler men áıelder oqýǵa bólek esikten kiretin bolǵan.

Sonymen qatar, áıelderge belgili bir jastan asqan basqa áıelder nemese er adamdar ǵana sabaq bere alatyn.

Qarasha aıynda Kabýldaǵy áıelderge qalalyq saıabaqtarǵa kirýge tyıym salyndy. Talıban mundaı áreketter sharıǵat normalaryn buzady dep esepteıdi.

Shamamen sol ýaqytta Aýǵanstan astanasynda áıelderge basseınder men sport zaldaryna barýǵa bolmaıtyny habarlandy.

Foto: GETTY IMAGES