«Áýezovtiń bóltirikteri», «Juldyz» jáne Áýezov» kitaptary jaryq kóredi

Bıyl Muhtar Áýezov týraly eki kitap jaryqqa shyǵady, dep habarlaıdy QazAqparat tilshisi.

«Qazaqstan Respýblıkasy Mádenıet jáne aqparat mınıstrligi úılestiretin «Ádebıettiń áleýmettik mańyzdy túrlerin satyp alý, basyp shyǵarý jáne taratý» kishi baǵdarlamasy aıasynda 2023 jyldyń sońyna deıin Orazbek Sársenbaıdyń «Áýezovtiń bóltirikteri» jáne jazýshy Mereke Qulkenovtiń qurastyrýymen «Juldyz» jáne Áýezov» atty kitaptar jaryq kóredi. Ár kitap 3 000 danada basylyp shyǵyp, elimizdiń memlekettik kitaphanalaryna taratylady», – dedi mınıstrlikten agenttik tilshisine.

Aıta keteıik, búgin, 28 qyrkúıek – qazaqtyń zańǵar jazýshysy Muhtar Áýezovtiń týǵan kúni. Alash zııalylarynyń izimen júrip, almaǵaıyp zamanda Ahmettiń (Baıtursynuly – avt.) aqylymen «elge ıe bop qalǵan», amandyǵymen qazaqtyń paıdasyna jarap, artyna ushan-teńiz eńbek qaldyrǵan Muhtar Omarhanulynyń týǵanyna 126 jyl toldy. Osyǵan oraı, QazAqparat jazýshy, fılologııa ǵylymdarynyń doktory, abaıtanýshy, áýezovtanýshy, alashtanýshy Tursyn Jurtbaıdyń Muhtar Áýezovke jabylǵan bir jala jaıynda jazylǵan «Áýezov – «Stalınniń favorıti» emes!» degen maqalasyn oqyrman nazaryna usynǵan edi.