Áýezov teatryn jańartý jumystary qashan aıaqtalady
ALMATY. KAZINFORM — Muhtar Áýezov atyndaǵy Qazaq ulttyq akademııalyq drama teatryn jóndeý jumystary 2026 jylǵa deıin aıaqtalady.
Almaty ákimdiginen málim etkendeı, qala basshysy Darhan Satybaldy teatrdyń qaıta jańǵyrtý jumystarymen tanysty.
Teatrdy jańartý qajettiligi onyń tehnıkalyq jaı-kúıine baılanysty týyndaǵan. Keıbir qurylymdar seısmıkalyq qaýipsizdik talaptaryna saı kelmegen, ınjenerlik júıeler tolyq eskirgen, al ǵımarattyń qasbeti men ishki keńistikteri ábden tozǵan.
Merdiger kompanııa ókilderiniń sózinshe, jobanyń basty maqsaty — teatrdyń tarıhı kelbetin saqtaý. Osyǵan baılanysty syrtqy qasbet qaıta jasalyp, ishki árleý jumystary — aspashamdar, barelefter, eden jabyny qalpyna keltiriledi.
Buǵan qosa, sahnalyq jabdyqtar jańartylyp, tehnıkalyq bólmeler zaman talabyna saı jabdyqtalady. Teatr ishinde artıster men qyzmetkerlerge arnalǵan jańa daıyndyq zaldary, jumys oryndary men qoıma qarastyrylady.
Qaıta jańǵyrtý jumystaryn teatrdyń 100 jyldyq mereıtoıyna oraı, 2026 jylǵa deıin aıaqtaý josparlanyp otyr. Bul óner ordasy elimiz úshin mańyzdy mádenı nysan.
Darhan Satybaldy teatr mańyndaǵy aýmaqty kórkeıtý jobasymen de tanysty. Joba ulttyq naqyshty saqtaýǵa, mýzykalyq aspap beınesindegi shaǵyn sáýlet nysandaryn ornatýǵa jáne sándik alma aǵashtaryn egýge baǵyttalǵan.
Osyǵan deıin Almaty qalalyq josparlaý jáne ýrbanıstıka basqarmasy qasbet eskızderin usynǵan bolatyn.
Eske salaıyq, 2020 jyly Áýezov teatryna «Ulttyq» mártebesi berilgen edi.