Áýezov aýdanynda jańa mektepter men balabaqshalar salynyp jatyr

ALMATY. KAZINFORM – Almatynyń Áýezov aýdanynda qosymsha oqý oryndaryn ashý men qoldanystaǵy bilim berý mekemelerin jańǵyrtý baǵytynda júıeli jumys júrgizilip jatyr. Bul týraly aýdan ákimi Abzal Egemberdıev Óńirlik kommýnıkatsııalar qyzmetiniń alańynda ótken baspasóz konferentsııasynda habarlady.

Aýdanda qazir 56 mektep jumys isteıdi, onda 59 myńnan astam oqýshy bilim alady. Degenmen áli de 5 myń oryn tapshy. Ony azaıtý maqsatynda mektepterdi jańalap, keńeıtip, qosymsha ǵımarattar salý jaǵy qolǵa alynǵan. Atap aıtqanda, №13, №72 jáne №158 mektepke arnalǵan jobalyq-smetalyq qujattama ázirlenip jatyr, bul olardyń syıymdylyǵyn 2 136 orynǵa arttyrýǵa múmkindik bermek. Budan bólek, №42 jáne №1 mektepke sáıkesinshe 300 jáne 400 oryndyq qosymsha ǵımarattar salý josparlanǵan.

Áýezov aýdanynyń ákimi mektepke deıingi bilim berý salasyndaǵy jaǵdaı týraly da baıandady. Aýdanda 47 memlekettik jáne 104 jeke balabaqsha jumys isteıdi, jalpy qamtý 18 myń balany quraıdy. Oryn tapshylyǵyn azaıtý maqsatynda 160 jáne 120 oryndyq eki balabaqsha salynyp bitýge jaqyn qaldy. Taǵy úsh balabaqshanyń qurylys jáne jobalaý jumystary bastalmaq. Onyń ishinde №52 «Araı» balabaqshasynyń syıymdylyǵyn arttyryp, №58 «Aqnıet» balabaqshasyn jańǵyrtý qarastyrylǵan.

Mundaı júıeli jumys Áýezov aýdanynyń turǵyndaryn qoljetimdi jáne osy zamanǵy bilim berý ınfraqurylymymen qamtamasyz etýge múmkindik beredi.

Aıta keteıik, Almatyda sporttyq ınfraqurylym keńeıtilip, buqaralyq sport keń qoldaý taýyp otyr.