Áýejaılardyń jekeshelendirilýi: Abaı Tasbolatov depýtattyq saýaldyń mańyzyn túsindirdi

ASTANA. QazAqparat - QR Parlamenti Májilisiniń depýtaty Abaı Tasbolatov áýejaılardy jekemenshikke berýge qatysty pikir bildirdi. Buǵan deıin bir top depýtattar osy máselege qatysty Úkimettiń atyna saýal joldaǵan bolatyn, dep habarlaıdy QazAqparat tilshisi.

"Mysaly, Shymkent, Taraz, Semeı sııaqty qalalardyń áýejaılarynda áskerı ushaqtar da bar. Ol áýejaılardy jolaýshylar tasymaly úshin ǵana emes, áskerı maqsattarda da paıdalanady. Ondaıdy "birlesip paıdalaný" deıdi. Al áýejaılardy básekelestik ortaǵa, ıaǵnı jekemenshikke bersek, qalaı bolady Eldiń qaýipsizdigi bar emes pe?", - dedi A.Tasbolatov QazAqparat tilshisine bergen suxbatynda.

Onyń aıtýynsha, Úkimettiń atyna depýtattyq saýal joldaǵan azamattar áýejaılardy jalǵa berýge qarsy emes. Degenmen, aldymen strategııalyq mańyzy bar nysandardy paıdalaný máselesin retke keltirgen jón. "Biz áýejaılardy jalǵa berýge qarsy emespiz. Biraq áskerı ushaqtar ushyp-qonyp júretin áýejaılardyń da bar ekenin umytpaýymyz qajet. Mine, osyndaı nysandardy paıdalanýdyń naqty bir tártibi bolýy kerek dep oılaımyz. Árıne, básekelestik ortaǵa bergen durys. Alaıda strategııalyq mańyzy bar máselelerdi de eskergen jón", - dep atap kórsetti A.Tasbolatov.

Aıta keteıik, ótke aptada Parlament Májilisiniń plenarlyq otyrysynda depýtat Vladıslav Kosarev general depýtattardyń alańdaýshylyǵyn jetkizdi. «Bizdiń depýtattyq saýalymyz Úkimettiń 2015 jylǵy 30 jeltoqsandaǵy №1141 qaýlysyna qatysty. Onda áýejaılardy básekelestik ortaǵa berý týraly aıtylǵan. Bizdińshe, atalǵan qaýly áýejaılardyń áskerı-strategııalyq maqsattaryna tolyǵymen sáıkes kelmeıdi. Osyny jan-jaqty zerdelep, ońtaıly sheshim tabý qajet», - degen bolatyn V.Kosarev.

Depýtattyq saýalǵa Qazaqstannyń halyq kommýnısteri partııasynyń músheleri, sondaı-aq general-leıtenant Baqytjan Ertaev pen general-leıtenant Abaı Tasbolatov qol qoıǵan. 

Foto: orenairport.ru