Áýejaılardy qorǵaý: Biryńǵaı avıatsııalyq qaýipsizdik qyzmeti qurylady

ASTANA. Kazinform – Elimizde biryńǵaı avıatsııalyq qaýipsizdik qyzmeti qurylmaq. Oǵan el áýejaılaryn qorǵaý ókilettigi beriledi. Bul týraly Kólik mınıstrligi Kazinform agenttiginiń resmı saýalyna joldaǵan jaýapta aıtylǵan.

— Azamattyq avıatsııa salasyndaǵy ýákiletti organ jáne mekemeler áýejaılardaǵy qaýipsizdik deńgeıin arttyrýǵa baǵyttalǵan birqatar jumysty atqaryp jatyr. Olardyń ishindegi eń mańyzdysy — Biryńǵaı avıatsııalyq qaýipsizdik qyzmetin qurý. Atalǵan qyzmet memlekettik mekeme nysanynda qurylady jáne olarǵa el áýejaılaryn zańsyz aralasý aktilerinen qorǵaý jónindegi ókilettik beriledi, - deıdi vedomstvodan.

Sondaı-aq mınıstrlik qaýipsizdik qyzmeti qalaı atqarylatynyn da naqtylaıdy.

- Bul fýnktsııalar biryńǵaı ortalyqtandyrylǵan memlekettik basqarý arqyly júzege asady. Qazirgi tańda osy qyzmetti qurýǵa negiz bolatyn quqyqtyq aktilerge ózgerister ázirlenip jatyr. Normatıvtik retteý jumysy aıaqtalǵannan keıin uıymdastyrýshylyq sıpattaǵy protses ótkiziledi, - delingen habarlamada.

Al, áýejaıdaǵy asa mańyzdy qyzmettiń biri — áýe dıspetcheri. Ol jerde otyryp, áýe keńistigindegi ushaqtyń óz baǵytynan adaspaı jol taýyp, qonýyna jaýap beredi. Qazaqstannyń azamattyq avıatsııa qyzmetkerleri kúni qarsańynda áýe dıspetcherleriniń qyzmeti týraly jazylǵan bolatyn.

Bıyl jyl sońyna deıin «Azamattyq avıatsııa akademııasy» aktsıonerlik qoǵamyna erekshe mártebe beriledi. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

Sonymen qatar elimizde azamattyq avıatsııany damytý strategııasy qashan qurylatyny týraly da aqparat berilip, «Qazaqstannyń avıatsııalyq ákimshiligi» AQ-ǵa nege kil sheteldik mamandar basshy bolatyny belgili boldy.